Zaintzak Gertu proiektuari jarraipena eman dio udalak, adinekoen etxeko zaintza sustatzeko asmoz
Adineko pertsona bat eta bere zaintzailea, Kontxan. Olatz Balda 
Donostiako Udalak, Gizarte Ekintza departamentuaren bitartez, lan saio bat egin du Zaintzak Gertu proiektuaren bigarren edizioaren barruan. Proiektu horren helburua etxeetan ematen diren iraupen luzeko zainketen esparruan berrikuntza lortzea da.
Gizarte Ekintzako zinegotzi Mariaje Idoetak nabarmendu duenez, “Donostiako zainketa eredua argi eta garbi bideratuta dago hala nahi duten adinekoak beren etxean ahalik eta denbora gehien egotera, eta ingurune komunitarioan parte hartu dezaten bultzatzen du, nahiz eta laguntzak eta zaintzak behar izan”.
Ekimen honen helburua da, halaber, zainketen tokiko ekosistema aktibatzea udal Etxez etxeko Laguntza Zerbitzuaren (ELZ) inguruan, zerbitzuaren eta zainketen ekosistemako gainerako eragileen artean loturak sortuz, Etxez etxeko Laguntza Zerbitzuaren laguntzailea pertsona, etxebizitza, zerbitzua eta ekosistemako agenteak lotzen dituen agente gisa ezagutu eta aitor dadin.
Horrekin guztiarekin, Zaintzak Gertu proiektuak zerbitzu estrategiko bat indartu nahi du Donostiako lehen mailako arretako gizarte zerbitzuen eskaintzaren barruan. Horretarako, haren irismena handitu eta iraupen luzeko zaintza behar duten pertsonek behar duten laguntza jaso dezaten ahalbidetu nahi dute, laguntzaile trebatuagoen bitartez eta beren zerbitzuak zainketekin lotutako agente komunitarioen beste proposamen batzuekin osatuz.
“Pertsona ardatz duen ikuspegi kolaboratibo hori zaintzeko modu berri bat da, eta inplikatutako eragile guztiek, laguntzaileetatik hasi eta erakundeetaraino, elkarrekin lan egiten dute kalitate handiagoko arreta eskaintzeko”, azaldu du udalak.
Zaintzak Gertu proiektua
Donostiako Udalak 2021ean jarri zuen abian Zaintzak Gertu proiektuaren lehen edizioa, bi jarduera ildotan egituratuta. Lehenengoak prestakuntza eta tutoretza prozesuen bidez, arreta zabalagoa, dibertsifikatuagoa eta pertsonalizatuagoa eskaintzea du helburu.
2022tik 2023ra bitartean garatutako lehen edizioan, udaleko ELZren enpresa kudeatzaileak Kalitatea Kudeatzeko Ereduan urtero hogei laguntzaile prestatzeko konpromisoa sartu zuen.
Bigarren edizio hau 2024an hasi zen, eta koordinazio figuretarako prestakuntza prozesu bat ere egiten ari da, taldea zerbitzuaren ikuspegi berriarekin eta etxeko laguntzailearen lanbide profilean txertatutako gaitasunekin lerrokatzeko.
Proiektuaren bigarren jarduera ildoa gobernantza kolaboratiboan oinarritzen da. Prozesu horretan, zainketen tokiko ekosistemako erakundeak eta eragileak elkartu egiten dira, etxeko iraupen luzeko zaintzak emateak planteatzen dituen erronka komunei buruz hausnartzeko eta proposamenak egiteko.
Ildo horretan kokatu da gaur goizean udaletxeko udal batzar aretoan egin den lan bilera. Bertan, hainbat elkarte eta gizarte erakunde elkartu dira. Bileran, akordioak zehaztu dituzte, eta joan den urrian egindako lehen bileran identifikatutako lankidetza ekimenen garapenean aurrera egin dute.
