Adinbizi eta Esfera proiektuek jaso dituzte aurtengo Donostia Innovation Challenge sariak
Donostiako hamar ikastetxetako 350 ikaslek parte hartu dute, eta hiria hobetzeko irtenbide berritzaileak garatu dituzte.
2024ko Donostia Innovation Challenge lehiaketako irabazleak. Donostia Sustapena 
Donostia Innovation Challenge lehiaketako finala jokatu dute astearte goizean Kursaalen. Sei talde finalistek euren proiektuen berri eman diote Biogipuzkoa, IKOR, Vicomtech, Developair eta Donostia Sustapena erakundeetako ordezkari banak osatutako epaimahaiari, eta, aurkezpenen ondoren, epaileek erabaki dute Axular Lizeoaren Adinbizi eta Ceinproren Esfera proiektuak aintzatestea. Lehenak, erosketa-orga adimendun bat proposatzen du, adineko pertsonei eta mugitzeko arazoak dituztenei egokitua; bigarrena, berriz, eskola jazarpena jasaten duten adingabeek beren sentimenduak komunikatu eta adierazi ahal izateko aplikazioa da.
Donostia Sustapenak antolatutako egitasmoan, partaideek hiria hobetzeko proiektu berritzaileak garatu behar dituzte 3D inprimaketa, robotika aurreratua, errealitate mistoa, adimen artifiziala edota gauzen Interneta (IoT) baliatuz. Hiriko hamar ikastetxek parte hartu dute aurten –St. Patrick’s, Altza BHI, Axular Lizeoa, Ekintza ikastola, Nazaret Fundazioa, Easo Politeknikoa, Cebanc, Ceinpro, Santo Tomas Lizeoa eta Elizaran LHI– bi kategoriatan banatuta: Bigarren hezkuntza-Batxilergoa eta Lanbide Heziketa. Helburua talentua, talde lana eta berrikuntzari lotutako gaitasuna lantzea da.
Irailetik abendura, 357 ikaslek osatutako taldeek hamabi erakunde laguntzaileek gainbegiratuta garatu dituzte beren proiektuak. Aurkeztutako 75 lanetatik kategoria bakoitzeko hiru finalistak aukeratu zituzten: Bigarren hezkuntza-Batxilergo kategorian, Ekintza Ikastolaren Etorkizuna, Axular Lizeoaren Adinbizi eta Nazaret Fundazioaren Vita Alert; eta Lanbide Heziketa kategorian, Easo Politeknikoaren DQR, Cebancen Taxiexpress eta Ceinproren Esfera.
Sari nagusiez gain, honako aitortzak ere egin dituzte:
- Proiektu diseinu onenaren saria: Etorkizuneko Berritzaileak (Altza BHI).
- Gizartean eragin handiena duen proiektuaren saria: One Touch (St. Patrick’s).
- Proiektu berritzaileenaren saria: Ecovertical (Ekintza Ikastola).
- Bideragarritasuna eta kudeaketa ekonomikoa: Hyband (Cebanc).
- Jarrerazko balioen aintzatespena: Chipair (Nazaret Fundazioa).
