Askek salatu du kide batek 2.000 euroko isuna jaso duela, Voxen aurka mobilizatzeagatik
Iazko apirilean Cervantes plazan Voxen aurka egin zuten elkarretaratzea.Beñat Parra 
Hainbat herri mugimendutako kide ugarik Vox alderdi ultraeskuindarraren aurkako elkarretaratzea egin zuten iazko apirilean Donostiako Cervantes plazan, Santiago Abascalen alderdiak bertan jarritako karpa informatiboarengatik. Elkarretaratzean zehar ez zen aparteko tentsio unerik eta istilurik gertatu, baina Aske antolakundeak salatu du elkarretaratzean parte hartu zuen militante batek, Jardun koordinakundeko kide batek zehazki, “2.000 euroko isuna” jaso duela.
“Kideari, 70 lagunen talde baten parte aktiboa izatea, ekitaldian parte hartzen zutenen kontrako mehatxuak, ostikadak eta polizia lerroa saltatzen saiatzea leporatzen diote. Ertzaintzaren arabera, horrek Voxekoen hitzartzea ondo ez entzutea eta Ertzaintzarengatik eskoltatuak joan behar izatea eragin zuen. Aipatzekoa da Poliziak ez zuela kide hau unean bertan ez ondoren identifikatu. Poliziak egindako identifikazio bisual baten ondorioz iritsi egin zaio isuna”, azaldu du Askek.
Isuna jasota ere, “mugimendu ultraeskuindarrei edo faxistei” aurre egiten jarraituko dutela nabarmendu dute: “Isun hau ez da mugimendu ultraeskuindarrei edo faxistei aurre egiteagatik iristen den lehendabizikoa eta argi dugu ez dela azkena izango ere. Poliziak eta instituzio burgesek, isunen eta epaiketen bitartez, borroka antifaxista itotzeko eta kriminalizatzeko helburua dute, hauteskundetan faxismoaren kontrako maskara jartzen duten bitartean. Argi utzi nahi dugu, ez dugu militantzia politikoagatik inolako jazarpenik onartuko eta faxismoaren kontrako borrokan berresten garela”.
