'Emakume zientzialariak argira' erakusketa ireki dute
'Emakume zientzialariak argira' erakusketa.Cristina Enea fundazioa 
Cristina Enea Fundazioak eta Elhuyarrek Emakume zientzialariak argira erakusketa inauguratu dute Gladys Enea parkeko Ingurumen Baliabideen Etxean, “emakume zientzialariak hurbiltzeko” helburuarekin. Apirilaren 27ra egongo da ikusgai, Emakume eta Neska Zientzialarien Nazioarteko Egunarekin bat eginez ireki dute.
Erakusketak hamabi figura zientifiko ditu hizpide, euren bizitza, lorpenak eta ibilbidea erakusketarako bereziki diseinatu diren laminen bidez azalduz. “Ekimen honen bidez, zientziari eta teknologiari modu esanguratsuan lagundu dioten emakumeen istorioak hurbildu nahi dizkiogu publikoari, eta haien lana eta ondarea ikusarazi”, azaldu du Eneko Calvo Etxarte fundazioko erakusketa proiektuen arduradunak.
Proiektuak hamabi emakume zientzialari hauek ditu hizpide: Amena Karimyan (Herat, Afganistan, 1996), astronomoa, aktibista eta idazlea; Dorotea Barnes Gonzalez (Iruñea, Nafarroa, 1904-2003), kimikaria; Halet Çambel (Berlin, Alemania, 1916-2014), arkeologoa eta eskrimalaria; Harriet Martineau (Norwich, Erresuma Batua, 1802-1876), ekonomialaria eta soziologoa, Jeanne Baret (La Comelle, Frantzia, 1740-1807), botanikaria; Lurdes Ansa Maiz (Andoain, 1961), zientzia materialen edizio arduraduna, Margaret Crane (Indiana, AEB, 1941), publizista eta asmatzailea; Maria Jesus Esteban Galarza (Alonsotegi, Bizkaia, 1955), matematikaria; Nawal El Saadawi (Kairo, Egipto, 1931-2021)., medikua, idazlea eta aktibista; Patricia Rodriguez Brennan (Bogota, Kolonbia, 1971), biologo ebolutiboa; Suzuko Ainhoa Tamura (Aichi, Japonia, 1934-2015), hizkuntzalaria eta Uxue Lazkano Dobao (Bergara, Gipuzkoa, 1995), biologo konputazionala.
