Goiak espero du «hurrengo hilabetearen barruan» sinatzea kuarteletako eskriturak
Aitor Estebani "eskerrak" eman dizkio alkateak, baita gogorarazi ere militarrek lau urte dituztela kuartelak uzteko, eskriturak sinatzen diren unetik aurrera.
Eneko Goia alkatea, artxiboko irudi batean.Donostiako Udala 
Espainiako Trantsizio Ekologikoko Ministerioak Donostiako Udalaren argudioak onartu ditu Loiolako kuarteletako hirigintza garapenari dagokionez, eta, horrekin, kuarteletako salerosketa operazioa desblokeatuta gelditu da. Eneko Goia alkateak “pozgarritzat” jo du albistea: “Oso urrats garrantzitsua da etenda genuen hitzarmena berreskuratu eta azken pausoa emateko, Loiolako kuartelak udalaren esku gelditu daitezen. Bide horretan genuen beste izapide bat gainditzen du honek, modu onean”.
Eskriturak sinatzeko epeei dagokienez, Goiak nabarmendu du “ahalik eta azkarren” egin nahi dutela: “Udal Tokiko Gobernu Batzordeak berraktibatu egin beharko du hitzarmena, eta ahalik eta azkarren egingo dugu hori. Ondoren, eskriturak sinatzeko data jartzea izango da, bioi [Espainiako Defentsa Ministerioari eta udalari] ondo datorkigun data bat, ahalik eta azkarren; hurrengo hilabetearen barruan espero dut hori egin ahal izatea”.
Halaber, alkateak gogorarazi du militarrek lau urte dituztela, eskriturak sinatzen diren unetik aurrera, kuarteletatik joateko. “Bitartean, bertan etorkizunean egingo den garapena zehaztuko duen planeamendua egiteari ekingo diogu”, gaineratu du Goiak.
Era berean, Aitor Esteban Espainiako Kongresuko bozeramaile jeltzaleari “eskerrak” eman dizkio alkateak, Estebanek iragarri baitu Espainiako Gobernuaren erabakia: “Badakit gainean egon dela. Prozesu guztian zehar, laguntzaile izan dugu Madrilen eta pozgarria da ikustea egindako lanak emaitzak eman dituela”.
