Hiriko hiru ikastetxek parte hartuko dute First Lego League txapelketaren finalean
Deustuko Unibertsitatean jokatuko dute lau finaletako bat hilaren 22an. Bertan, 40 talde lehiatuko dira, bost, donostiarrak.
FIRST LEGO Leagueren aurkezpena, gaur, udaletxean.Andrea Bosch 
First Lego League (FLL) hezkuntza programak hilaren 22an erabakiko ditu aurtengo txapeldunak. Lau finalak aldi berean jokatuko dituzte Donostian, Arrasaten, Bilbon eta Gasteizen, eta 170 taldek aurkeztuko dituzte garatutako berrikuntza proiektuak eta egindako robotak. Hirian, Deustuko Unibertsitatean elkartuko dira 40 taldeko 400 bat gazte eta entrenatzaile. 22 FLL Challengen (10-16 urte) eta hamazazpi FLL Explorerren (6-9 urte) lehiatuko dira, horien artean, Axular Lizeoko hiru –Overclock Axular, Legoshark eta Itsabot–, The English School-eko Artemisa eta Santo Tomas Lizeoko Lizeobots. Gainera, ehun boluntariok ere parte hartuko dute.
Hezkuntza programa honen helburua da 6 eta 16 urte arteko gazteengan bokazio zientifiko-teknologikoa sustatzea, modu dibertigarrian eta praktikoan. Euskadin, Innobasque Berrikuntzaren Euskal Agentziak antolatzen du, Deustuko Unibertsitatearekin, Mondragon Unibertsitatearekin eta Euskal Herriko Unibertsitatearekin lankidetzan. Halaber, 39 erakunderen babesa du, tartean, Donostia Sustapena, Gipuzkoako Foru Aldundia edota Aquariuma.
Aurten pertsonek ozeanoak nola eta zergatik esploratzen dituzten ikasi dute DBHko eta Batxilergoko 2.000 ikaslek baino gehiagok, prestatutako erronkei aurre egiteko. Era berean, azaroaren 11tik abenduaren 17ra aukera izan dute ozeanografian izan diren aurrerapenen berri izateko eta ozeanoaren eta espazioaren artean dagoen harremana ikasteko. Online prestakuntza tailerrez gain, egitasmoa lagundu duten erakundeetara bisitak ere egin dituzte: Aquariuma, AZTI, BCAM, Donostiako Itsaspeko Zinemaren Nazioarteko Zikloa, Sener, EHU eta Vicinay Marine. Hala, erakunde horietako adituen eskutik ozeanoen esploraziorako teknikak ezagutu eta itsasoen biodibertsitatea zaintzeko egiten ari diren ahaleginen berri izan dute.
