Hungariako kaldereroak iritsi dira Loiolara ere
Loiolako kaldereroak. Nagore Garmendia 
Azken bi asteburuotan, kaldereroak ospatu dituzte Amara Berrin, Egian, Herreran, Aieten, Grosen, Txomiñenean, Parte Zaharrean eta Amaran. Ordea, kaldereroen mailu eta zartagin hotsak oraindik ez dira isildu Donostian, larunbat arratsaldean bertan, Loiolan ere izan baitziren.
18:30ean abiatu ziren Hungariako kaldereroak Loiolatarra kaletik, Jon San Martin tribu buruaren gidaritzapean. Zartagin eta mailuen hotsak musikaz laguntzeko, Ilargi txarangaren laguntza izan zuten lehen aldiz; izan ere, orain arte, 30 urtez baino gehiagoz, Nekaezinak txarangak egiten baitzuen lan hori auzoan. Erregina Iñaki Arrillagak gorpuztu zuen, eta damak Asier Zubimendi eta Antton Apezetxea izan ziren. Hirurak Estitxu Artanok makillatu zituen.
Ibilbidearen amaieran, Latsarien plazan, diskurtsoa eskaini zuten protagonistek, eta etorkizunean Loiolan egongo diren zirkulazio arazoak izan zituzten hizpide, kritika eginez. Diskurtsoaren amaieran, lore sortak banatu zizkieten belaunaldi berrietako kideei: Jon San Martin, Ilargi txaranga eta Aitor Ugarte izan ziren lore sortak jaso zituztenak.
Hona hemen Loiolako kaldereroen irudiak:
