Hogeigarren urteurreneko ekitaldia, iruditan
San Telmo museoko aretoa jendez bete da IRUTXULOKO HITZAren hogeigarren urteurreneko ekitaldian.
2005eko otsailaren 17an argitaratu zen IRUTXULOKO HITZAren lehenengo alea. Atzo, hogei urte bete zirela aprobetxatuta, ekitaldia egin genuen San Telmo museoan hiriko eragile eta pertsona ugarirekin. Gure komunitatearekin.
IRUTXULOKO HITZAko Xalba Ramirez eta Andrea Boschek aurkeztu zuten ekitaldia, eta bertan izan ziren Eneko Goia alkatea eta Amets Ibero Bagera Euskaltzaleen Elkarteko ordezkaria. Gure hiriaren oraina euskaraz kontatzearen garrantzia nabarmendu zuten biek ala biek, eta etorkizunean, euskararen hiria eraikiko badugu, hori, IRUTXULOKO HITZAren bidetik etorriko dela aldarrikatu dute.
Beñat Parra IRUTXULOKO HITZAko zuzendariak hartu zuen hitza, eta aurtengo kanpaina aurkezteko baliatu zuen: Mundua osoa da tokikoa. Tokiko kazetaritzak dituen funtzio eta egiteko bereizgarriak aldarrikatu zituen: Garaiko kronika behetik gora egitea eta Donostiaren kontakizun berri bat sortzea. “Donostia asko sortzen diren Donostia baten alde”, lanean jarraituko dugula aldarrikatu zuen Parrak.
Azkenik, Inaxio Esnaola kazetariak gidaturiko mahai ingurua interesgarria izan zen Aizpea Goenaga, Beñat Gaztelumendi eta Sua Enparantza kulturgileekin. Belaunaldi ezberdinetatik, hiriaren azken hogei urtetako kronika egin zuten, IRUTXULOKO HITZAren papera nabarmenduz.
