Urruntze agindua ezarri diete ustez bi haurri sexu erasoa egin dieten bi irakasleei
Donostiako epaitegiak, Egia auzoan. 
Guardiako epaitegiak urruntze agindua ezarri die ikertutako bi irakasleei, Donostiako ikastetxe bateko bi adingaberi sexu erasoa eta tratu umiliagarria ematea egotzita. Noticias de Gipuzkoa egunkariak argitaratu duenez, ikertuen etxebizitzetan beharrezko miaketak egin eta bederatzi ordu iraun zuen galdeketa bat egin ondoren altxatu zen sumarioaren sekretua.
Bi irakasleak atzo goizean joan ziren epaitegira. Deklaratu ondoren, epaileak biak aske uztea agindu zuen, baina ustezko biktimengana hurbiltzeko debekua ezarri zien auzia izapidetzen den bitartean, eta aldian-aldian epaitegian aurkezteko betebeharra jarri zieten.
Zentroaren egoitza Landetxe etxean dago, Aiete eta Amara artean, eta Katalina de Erauso arte elkarteak kudeatzen du. Elkarte horren helburua artearen inguruko era guztietako prestakuntza eta sormen jarduerak sustatzea da.
Zentroko familien babesa hezitzaileei
Zentroko familiek babesa agertu zieten atzo ikertutako bi hezitzaileei, “oraindik frogatu ez diren akusazioen jomuga” direla iritzita. Ohar batean adierazi zutenez, justiziak “zorroztasunez eta objektibotasunez jokatuko du egoera argitzeko”, eta informazioaren tratamenduan “erantzukizunez eta zorroztasunez” jokatzeko deia egin zuten.
Gaineratu zuten irakasleek eta laguntzaileek “uneoro erakutsi dutela gure seme-alaben hazkunderako eta ongizaterako funtsezkoak izan diren dedikazioa eta profesionaltasuna”.
