EAJk Atano III.a pilotalekuan egingo du bere Batzar Nagusia
Atano III.a pilotalekua, Amara Berrin. Mikel Elkoroberezibar Beloki 
EAJk martxoaren 29an eta 30ean egingo du bere IX. Batzar Nagusia, Donostiako Atano III.a pilotalekuan. Euzkadi Buru Batzarreko presidente berria aukeratzea da batzarraren helburu nagusia.
Martxoaren 29an, 10:00etan, txostenei aurkeztu zaizkien zuzenketak eztabaidatuko dituzte eta, ondo bidean, hurrengo Euzkadi Buru Batzarraren ekintza politikoa egituratuko duten bost txostenen behin betiko testuaren onarpena egingo dute. Era berean, eztabaidatuko dituzte ebazpen proposamenak eta prozesuan jasoko diren jakinarazpenak irakurriko dituzte.
Hurrengo egunean, ordezkari jeltzaleek Batzar Nagusiaren zereginekin jarraituko dute 10:30etik aurrera, Aberri Batzarreko ordezkariek EBBren presidente berria eta 2025-2029ko aldirako burukide berriak aukeratuz. 11:30ean, Atano III.aren ateak irekiko dituzte, gonbidatuak eta komunikabideetako profesionalak Euzkadi Buru Batzarraren lehendakari berriaren aldarrikapenaren eta bere lehen hitzaldiaren lekuko izan daitezen.
“Baldintza emozional, politiko eta logistikoak”
EAJk nabarmendu du pilotalekuak “baldintza emozional, politiko eta logistiko guztiak” betetzen dituela EAJren Batzar Nagusiaren “unerik gogoangarriena bertan egiteko”: “Donostiako gune pribilegiatu eta ondo komunikatutako batean dago kokatuta. Gune osoa dago eraberritze eta berritze prozesu sakon batean murgilduta, eta, hura amaitutakoan, Europako abangoardian jarriko du Donostiako hiria kirol eskaintzaren arloan”.
Jeltzaleek, halaber, gogorarazi dute “sinbolismoz betetako agertokia” dela Atano III.a pilotalekua: “Atano III.ak ere leku nabarmena ere badu Euskadiko imajinario kolektibo eta politikoan. Oroimen kolektiboan bizirik daude oraindik 1967an Uztapide eta Xalbador bertsolarien artean egin zen sekulako final hura, bai eta Retegi I.aren eta Gorostizaren arteko eta Retegi II.aren eta Galarza III.aren arteko eskuz banakako finalak ere. Arlo politikoari dagokionez gogoratzeko modua da 1970eko irailaren 18an, Joseba Elosegi gudari eta buru jeltzaleak Francisco Franco Munduko Pilota Txapelketan zegoela aprobetxatu zuenekoa. Atano III.ak ere, garai hartan Anoetako pilotalekua zenak, 1976ko ekainaren 13an EAJren historia modernoaren beste mugarri esanguratsu bat hartu zuen. Egun hartan, Xabier Arzalluz buruzagi jeltzale gogoratuak bere lehen hitzaldi masiboa eman zuen, frankismoaren ondoren baimendutako lehen ekitaldi politikoa izan zena”.
