«Ez gara bigarren mailako donostiarrak»
'Barkaiztegin soluzioak!' lelopean, Martuteneko bizilagun askok bat egin dute Sarroeta auzo elkarteak deituriko protestarekin.
Sarroeta auzo elkarteko kideak, otsaila bukaeran egindako manifestazioan.Maider Artola Martuteneko bizilagunek urteak daramatzate auzoa Barkaiztegirekin lotuko duen pasabide berria eskatzen. 2021ean Donostiako Udalak trenbidearen gaineko azpiegitura eraikitzeko asmoa iragarri zuenetik, bizilagunek ez diote itxaroteari utzi, baina “nazkatuta daude”. Hala ere, agindutako obrak ez dira hasi ere egin. Egoera honek “frustrazioa eta atsekabea” sortu ditu auzotarren artean, udaleko agintariek promesak egin arren.
Atzo iluntzean, elkarretaratze jendetsua egin zuten Martuteneko Okendotegi bidean, Barkaiztegin soluzioak! lelopean. Herritar askok bat egin zuten Sarroeta auzo elkartearen deialdiarekin. Protestaren ondoren, auzo elkarteko kideek hartu zuten hitza. “Ez gara bigarren mailako donostiarrak” salatu zuen auzo elkarteko presidente Maite Barronek. Martuteneko beste guneen antzera, Barkaiztegi hazten ari den eremua dela nabarmendu zuen, eta hara iristeko modua “zaildu” egin duela “sarbide eraginkorren faltagatik”.
2021ean Martuteneko beheko aldea eta Barkaiztegi pasabide baten bidez lotzeko promesa gogo handiz iragarri zuten. Azpiegitura horrek bertakoen mugikortasuna hobetzeaz gain, tokiko merkataritzari ere mesede egitea espero zen, hiriko merkataritza eta aisialdi guneetarako sarbide zuzena erraztuko baitzuen. Proiektuak helburu argia zuen: argi gehiago egotea eta erosketak egiteko edo farmaziara joateko denbora gehiegi ez pasatzea. “Lehen hori guztia hamar minututan egin zitekeen, baina orain egiteko modu argirik ez dagoenez, ordu erdi behar da eta gainera arrisku barne”, adierazi zuen Laida Etxeberria Sarroeta auzo elkarteko kideak.
Laida Etxeberria —mikroa eskuan duela— eta Maite Barron, auzo elkarteko ordezkariak.Maider Artola
Auzokideak zapuzten dituen atzerapena
2021ean iragarpen ofiziala egin arren, Martuteneko eta Barkaiztegiko egoiliarrentzako errealitatea oso bestelakoa izan da. Obrak hasteko agindutako epeak behin eta berriz bete gabe geratu dira, eta herritarrak sentsazioarekin utzi dituzte. “Trenbide gaineko pasabidearen eraikuntza errealitate ukigarri batean baino gehiago paperaren gaineko proiektu batean” geratu dela deitoratu zuen auzo elkarteak.
Hasierako konpromisoa zen obrak duela lau urte amaituko zirela, baina hilabeteak pasatu ziren eta ez zen aurrerapauso nabarmenik egon. Hala ere, “ageriko aurrerapausorik ezak utzikeria sentimendua sortu duela” adierazi zuten bizilagunek, hobetzeko promesak denborak diluitu ahala.
Barkaiztegiko bizilagunek ez dute soilik irisgarritasuna hobetu nahi. “Zubi hori eraikitzeak osagai sozial eta ekonomiko indartsua du”, nabarmendu zuten. Dagoeneko bizitza lasaia baina hirigune handietatik urrun bizi direnek, horrelako azpiegiturak behar dituzte beren egunerokoa errazteko. Lanera joateko eta eguneroko kudeaketak egiteko, konexio egokirik ez izateak ibilbideak luzeagoak eta konplexuagoak izatea eragiten du, eta, gainera, eremu honen hazkunde aukerak mugatzen ditu. “Nire adinagatik ezin naiz hain urrun joan, eta horrek gauza asko egitea eragozten dit. Guztiontzat sufrimendua da”, esan zuen bizilagun batek.
Osoko bilkuran
Etzi, hilak 27, Barkaiztegiko bizilagunak otsaileko udalbatzarrera joango dira, “azalpen bat” eta gaiari berriro hel diezaioten eskatzeko agintariei. “Gaur hona etorri zareten guztiei eta etortzerik izan ez duzuenoi ostegunean etortzeko gonbitera luzatzen dizuegu. Funtsezko gaia da eta ezin dugu alde batera utzi”, esan zuten auzo elkarteko kideek.
