Donostiako emakumezkoen bederatzi kirol talde ari dira maila gorenetan lehiatzen
Donostia Arraun Lagunak-eko arraunlariak, Oriako jaitsieran lorturiko garaipena ospatzen.Onintza Lete Arrieta / Guka 
Urteroko legez, Donostiako eliteko emakumezkoen kirol taldeen inguruko azterketa egin du —2014tik egiten du azterketa—, eta, udalak nabarmendu duenez, ondorioek “berresten” dute Donostia “eliteko emakumezkoen kirolean lider den hirietako bat” dela.
Hamalau kirol diziplina aztertu dituzte: futbola, saskibaloia, eskubaloia, hockeya, boleibola, waterpoloa, errugbia, izotz hockeya, softbola, areto futbola, arrauna, curlinga, igeriketa eta atletismoa. Eta, horietatik, zortzitan ari dira emakumezkoen talde donostiarrak maila gorenean lehiatzen. Zehazki, bederatzi talde daude guztira maila gorenetan: Bera Bera eskubaloian, Reala belar hockeyan eta futbolean, Ibaeta Basket saskibaloian, Donostiako Atletiko atletismoan, Txuri Urdin izotz hockeyan, Txuri Berri curlingean eta Donostia Arraun Lagunak eta Donostiarra arraunean. “Harrotasun eta hiri marka handia da gure emakumezkoen kirolaren indarra, urteak baitaramatza goren-gorenean, egiten duten lan handiari esker”, nabarmendu du Iñaki Gabarain Kiroletako eta Bizitza Osasungarriko zinegotziak.
Podiumean
Horrela, eliteko emakumezkoen talde kopuru absolutuari dagokionez, Espainiako Estatuko sailkapeneko hirugarren postuan dago hiria, Bartzelonaren (hamaei talde) eta Madrilen (hamar talde) atzetik. Guztira, estatuko 84 hirik dute talderen bat maila gorenean.
Bestalde, Gabarainek nabarmendu duenez, “talde kopuruaren eta biztanleriaren arteko erlazioa aztertzean, Donostia da ratio onena duen probintziako hiriburua, 21.010 biztanleko talde batekin, Bartzelona baino askoz ere lehenago, talde gehien dituen hiria dena (talde bat 106.409 biztanleko). Bigarren tokian Soria dago, talde bakarra duen arren 40.750 ratioa baitu. Iruñea sailkapen honetako hirugarren postura igo da aurten, bost talde eta 41.555 biztanleko ratioarekin”. Bestalde, Gasteizek bi talde ditu guztira eta, beraz, 128.984 biztanleko bat, eta, Bilbok talde bakarra du maila gorenean (348.089 biztanle).
Kirol modalitateen aniztasunagatik ere sailkapeneko goiko postuetan dago Donostia, zortzi modalitateetan baititu taldeak elite mailan. Zehazki, bigarren postuan dago hiria kategoria horretan, Bartzelonaren atzetik. Gainera, talde donostiar horietako ugarik txapelketa garrantzitsuak irabazi dituzte urteotan. “Emaitza horiek berretsi egiten dute Donostia erreferente eztabaidaezina dela eliteko emakumeen kirolean, eta berretsi egiten dute lehiaketan kirol bikaintasunarekin eta genero berdintasunarekin duen konpromisoa”, nabarmendu du Gabarainek.
