Balbino Saenz Olarra preso donostiarra da aske geratu den lehena
Euskal presoei zigorrak ez batzeko erreforma aplikatu dio Espainiako Estatuak.
Balbino Saenz Olarra preso donostiarra, Martuteneko espetxetik atera ostean. 
Martxoaren 7an atera zen Martuteneko espetxetik Balbino Saenz Olarra preso donostiarra. Aurreneko aldia da euskal preso bat aske geratzen dena Espainiako Estatuak euskal presoei aplikatu dien zigorren batuketa baliogabetzeko erreforma baliatuta.
Iazko urrian aldatu zuten araua. Horrela, Espainiako Auzitegi Nazionala aske utzi du Saenz Olarra, dagoeneko ez dagoelako indarrean Frantzian betetako zigorrei Espainian ezarritakoak gehitzeko irizpidea.
Donostiarrak 2022ko abenduan bete zuen zigorra, Frantzian preso egondako denbora kontuan hartuta. Erreforma aintzat hartu izan ez balute, espetxean jarraitu beharko zukeen 2029. urtera arte.
“Pozgarria eta kezkagarria”
Sare herritarrak Saenz Olarraren inguruko oharra plazaratu du. “Zigorra osorik betetzeagatik aske uztea pozgarria da, baina baita kezkagarria ere”, adierazi dute. 7/2014 Legea urrian aldatu zela gogoratu dute, eta Auzitegi Nazionalak “nahita” moteldu duela aplikatzeko prozesua: “Ordutik, 52 preso daude legea aplikatzeko zain. Eskubideak urratzen ari dira, preso asko behartzen baititu auzitegiek ezarritako zigorra baino denbora gehiago askatasunaz gabetzera”.
