Gazte literatura ardatz duen Lumafest jaialdiaren egitaraua aurkeztu du Gipuzkoako Foru Aldundiak
Apirilaren 3tik 5era bitartean aurrera eramango dute Parte Zaharreko Santa Teresa Komentuan.
Paula Estevez diseinatzaileak egin du jaialdiaren kartel berria. Gipuzkoako Foru Aldundia 
Gipuzkoako Foru Aldundiak gazte literatura eta gazteen sormena ardatz dituen LUMAfest jaialdia antolatu du laugarren urtez. Apirilaren 3tik 5era aurrera eramango dute Parte Zaharreko Santa Teresa Komentuan. Antolatzaileek ezagutarazi egin dituzte gaur goizean egitaraua, eta publiko gaztearentzat puntakoak diren idazleek parte hartuko dute, hala nola, Joana Marcus, Allison Saft eta Alice Kellen.
Irakurle eta idazle gazteen topaleku izan nahi du LUMAfestek bi zaletasun horien inguruan gazte komunitateen sorrera bultzatuz eta gogoeta eta pentsamendu kritikoa sustatuz. “Irakurketa eta idazketa bultzatzeko espazioak sustatzen jarraitu nahi dugu, haien botere eraldatzailean konfiantza dugulako hausnarketa kritikoaren eta irudimenaren ariketatik abiatuta”, adierazi du Kultura Sustapen eta Gazteria zuzendari Isaac Palenciak.
Jaialdiaren “identitate bisuala indartzeko eta ekimenaren espiritua jasoko duen irudi ezagun eta egonkor bat izateko”, Paula Estevezek diseinatutako kartel berria du jaialdiak. Estilo “ausart eta feminista” du eta ideia hau jasotzen du: irakurketak ateak irekitzen ditu eta norberaren subjektibotasuna gainditzen duten beste esperientzietara sarbidea ematen du.
Hiru saio
Apirilaren 3an, Lur Gallastegi Go!azen telesail ezaguneko liburuen egileak Zurriola beach hostel nobela berria aurkeztuko du. Gallastegik mahai inguru batean parte hartuko du Nerea Ibarzabal idazle eta bertsolariarekin, 18:00etan. Ondoren, ohiko formatuetatik aldenduta, Formol Laborategia kolektiboak bere Album argitalpenetik abiatuta, hitzaldi eta irakurketa dramatizatu baten arteko hibridazioa eskainiko du, 19:15ean.
Hurrengo egunean, apirilak 4, Allison Saft eta Joana Marcusek hitzaldi bana emango dute, 18:00etan eta 19:30ean, hurrenez hurren. Marcusen saiora joateko aurrez izena eman beharko da, martxoaren 17tik aurrera.
Azkenik, apirilaren 5ean, Bruno Puelles antzerki irakasleak eta Lidia Cipres egileak hitzaldi bat emango dute girotzeak eta pertsonaiak sortzeko teknikei buruz, 18:00etan. Ondoren, mikrokontakizun lehiaketako sariak banatuko dituzte, 19:00etan; eta amaitzean, Alice Kellen entzuteko aukera izango da, 19:30ean hasita.
Ikus egitarau osoa hemen.
Mikrokontakizun lehiaketa
Hilaren 19a arte parte har dezakete 14 eta 21 urteko gazteek mikrokontakizun lehiaketan. Aurten Desira(tu) / Deseo da lan guztiek izan behar duten lehiaketaren kontsigna. Mikrokontakizunek gehienez 240 karaktere izan behar dituzte, euskaraz edo gaztelaniaz idatz daitezke, eta Instagram edo X bidez aurkeztu behar dira, #lumafestibalamikros traola erabiliz eta jaialdiaren kontua aipatuz (@lumafestibala bi plataformetan), edo mezu bat bidaliz info@lumafestibala.com helbidera. Oinarriak jaialdiaren webgunean kontsulta daitezke.
