Itzulera gozoa eta oparoa
Realeko belar hockeyko taldea garaipen sendo batekin bueltatu da atsedenalditik, Bartzelonari 7-1 irabazita.
Realeko belar hockey taldeko neskak Bartzelonaren kontrako gol bat ospatzen.Reala Belar hockey denboraldiari heldu dio berriz ere Realak. Larunbat eguerdian, Bartzelona azken sailkatua aise menderatu zuten txuri-urdinek (7-1). Katalanak aurretik jarri ziren markagailuan zoritxarrezko gol batekin, baina donostiarrek buelta eman zioten Lara Pampin, Laura Garate, Sara Puglisi eta Julene Sanchezen golei esker. Realak garaipen handia lortu zuen lehiaketaren itzuleran, hiru hilabete ondoren, eta sailkapenerako bosgarren postura igo da.
Izotz hockeyan, Txuri Urdineko neskek azkenera arte borrokatu zuten, baina batzuetan gauzak ez dira ateratzen. Kolpe gogorra jaso zuten larunbatean Majadahondaren aurka (0-3), baina atzo buelta eman nahi izan zioten eta 2-1ekoa lortu zuten. Partida erabakigarria Madrilen jokatuko da datorren larunbatean, hilaren 15ean, eta ordutegia zehazteko dago oraindik. Txanponaren beste aldean daude Txuri Urdineko mutilak. Donostiarrek galdu egin zuten gizonezkoen ligako finalerdietako hirugarren partida, Jacaren aurka (4-10), eta, ondorioz, Aragoiko taldea finalera igaro da, seriea 3-0 irabazi ondoren.
Futbolean, Realeko neskek ez dute asmatzen. Hutsean berdindu zuten larunbatean Levante Badalonari egindako bisitan (0-0). Donostiarrek hobera egin zuten minutuek aurrera egin ahala, baina asmatu ez izanak garaipena lortzea eragotzi zioten. Realeko mutilek, aldiz, galdu egin zuten atzo gauean Sevillaren aurka (0-1), eraginkortasun faltak talde txuri-urdina berriro zigortu zuen norgehiagokan. Sailkapenean gora egiteko aukera on bati ihes egiten utzi diote donostiarrek. Bestalde, ostegunean, hilak 13 (21:00tan), erronka gogor bat edukiko du Manchester Uniteden aurka, final-laurdenetara sailkatu ahal izateko. Gogoratu behar da bana egin zutela joanekoan, eta, beraz, txuri-urdinek bai ala bai irabazi beharko dute.
Saskibaloian, Ibaeta Basketek modurik krudelean galdu zuen atzo Araskiren aurkako derbia Gaskan (71-72). Azken segundoetan arabarrek sarturiko hiruko batek zapuztu zuen dena. Denboraldia bukatzeko sei jardunaldi falta direnean, donostiarrek beheko postuetatik ateratzeko garaipenak beharko dituzte. Bestalde, Gipuzkoa Basketek huts egin zuen Cartagenaren aurka (81-73), eta ACB Ligara igotzeko play-offean sartzeko aukerak nabarmen zaildu zaizkio.
EMAITZAK
Belar hockeya
Emakumezkoen ohorezko maila, 12. jardunaldia
- Reala 7 – Bartzelona 1
Izotz hockeya
Emakumezkoen ligako titulurako kanporaketa, finala
- Hirugarren partida: Txuri Urdin 0 – Majadahonda 3
- Laugarren partida: Txuri Urdin 2 – Majadahonda 1
Gizonezkoen iberiar ligako titulurako finalerdiak
- Hirugarren partida: Txuri Urdin 4 – Jaca 10
Futbola
Emakumezkoen liga, 21. jardunaldia
- Levante Badalona 0 – Reala 0
Gizonezkoen liga, 21. jardunaldia
- Reala 0– Sevilla 1
Saskibaloia
Emakumezkoen lehen maila, 25. jardunaldia
- Ibaeta Basket 71 – Araski 72
Gizonezkoen bigarren maila, 23. jardunaldia
- Cartagena 81 – Gipuzkoa Basket 73
