Kontxak, Ondarretak eta Zurriolak berriro lortu dute Ecoplayas Bandera
Castellon egindako Hondartzen Nazioarteko XXIII. Biltzarrean ezagutarazi dute; besteak beste, hareatzaren eta uraren kalitatea eta kudeaketa aitortzen du ikur horrek.
Ecoplayas Bandera jaso dute hiriko hiru hareatzek.Donostiako Udala 
Donostiako hiru hondartzek Ecoplayas Bandera lortu dute berriz ere, Castellon (Valentzia) aurrera eraman dute Hondartzen Nazioarteko XXIII. Biltzarrean. Bandera horrek ziurtatzen du hareatzak ondo kudeatzen eta garbitzen direla, uren kalitatea eta ingurumen politika egokiak direla eta hobekuntzak egin direla hondartzetan erabiltzaileei ematen zaien zerbitzuan.
Hondartzetako zinegotzi ordezkari Carlos Garciak azaldu duenez, Donostiako hondartzetako zerbitzuen eta garbiketaren kalitatea berresteaz gain, aintzat hartu dute sorospen-zerbitzuak artatzen dituen pertsonen pribatutasuna gordetzeko babes-pantailak eta sorospen zerbitzurako ontzi motordun bat erosi izana ere. Ontzi hori bainularien larrialdiei erantzuteko erabiltzeaz gain, karabela portugaldarren eta beste marmoka batzuen aurrean jarduteko ere baliatu dute.
Horrez gain, kontuan hartu dute bai Kontxan eta Ondarretan bainulariak hobeto ikusi eta babesteko baliza berriak jartzeko prozesua amaitu izana bai Zurriolan erabiltzaileen eta surflarien arteko bizikidetzari buruzko informazio liburuxkak banatu izana.
Ecoplayas Banderak emateaz gain, zenbait gairi buruz eztabaidatu dute biltzarrean. Hala nola, klima-aldaketak itsasertzean dituen efektuak eta ondorioak, kostaldea behatzeko eta zaintzeko erabiltzen den teknologia, eredu turistikoak eta horrek kostaldean duen eragina, hondartzetako espezie inbaditzaileak (algak, marmokak…), arrainen ustekabeko etorrera masiboak, eta salbamenduarekin eta sorospenarekin lotutako kontuak.
