«Pozik, polita baita etxera itzultzea»
Ibaeta Basketera itzuli berritan, Maria Erauntzetamurgil saskibaloi jokalari donostiarra elkarrizketatu du BERRIA-k.
Maria Eraunzetamurgil. 
Maria Erauntzetamurgil (Antigua, 1998) duela gutxi itzuli da Ibaeta Basketera, kanpoan hiru denboraldi egin ondoren. BERRIA-k saskibaloi jokalari gaztea elkarrizketatu du [pasa den asteburuko partidaren aurretik], eta dituen sentsazioez aritu da, besteak beste.
Orkatilako lesio bat medio, ez du jokatzeko aukerarik izan. Horrela ere, faltan diren jardunaldietan taldea laguntzeko gogotsu dagoela dio. Elkarrizketako pasarte batzuk jarraian irakur ditzakezue. Osorik, berriz, hemen.
Aste batzuk dira IDKra itzuli zarela. Zer moduz?
Pozik, polita baita etxera itzultzea. Baina, aldi berean, apur bat zailak izan dira aste hauek. Orkatilako lesio batekin etorri nintzen, eta kostatzen ari zait multzoaren egunerokora egokitzea. Baina espero dut falta diren partidetan nire onena ematea.
Etxera bueltatzeko garaia zela aipatu zenuen aurkezpenean. Zer dela eta?
Pertsona eta kirolari naizen aldetik, itzultzeko beharra nuen. Etxekoekin egon nahi nuen, eta jokatzeko aukera askorik ez eduki ostean, berriro ere jokalari sentitu. Gutxi jokatzea gogorra da. Banekien bai entrenatzaileak eta bai presidenteak nigan konfiantza zutela, eta hori garrantzitsua zen niretzat. Gainera, taldea ligan egoera zailean dagoela kontuan hartuta, ez nuen bitan pentsatu. Nire bizitzako taldea laguntzera etorri nahi nuen.
Ensinon, Estudiantesen eta Valentzian jokatu duzu, eta, besteak beste, Euroligan aritu zara. Baina esaerak dioen moduan: etxean bezala inon ez?
Argi dago senideekin eta lagunenekin egotea bezalakorik ez dagoela. Baina kanpoan ere oso esperientzia politak bizi izan ditut, eta zoriontsu izan naiz saskibaloian jokatzen. Nork daki etorkizunean halako esperientzia gehiago iritsiko ote diren. Baina, orain, arreta osoa hemen dut, eta ilusio handiz nago. Horregatik sinatu dut denboraldi honetarako eta beste birako. Gozatu eta disfrutatu egin nahi dut IDK-ko jokalari izanda.
Kanpoan bizitakotik zer nabarmentzen duzu?
Etxetik ateratzen nintzen lehen aldia zen, eta esperientzia honek lagundu dit neure burua hobeto eta gehiago ezagutzen. Kirol ikuspegitik, berriz, eskarmentu handiagoa hartu dut, eta aukera eman dit egunerokoa jokalari eta kirolari moduan izugarriak diren pertsonekin partekatzeko.
