Bidaiari baten bizitza salbatu zuen autobus gidari donostiarrari aitortza egin dio aldundiak
Isabel Perez Marcos Lurraldebuseko gidariak bihotzekoa izan zuen bidaiari bat artatu zuen azaroan.
Isabel Perez Marcos, erdian, Azahara Dominguez diputatua eta Susana Garcia Chueca sailburua alboetan dituela.Gipuzkoako Foru Aldundia 
Isabel Perez Marcos Lurraldebuseko gidari donostiarra omendu du Gipuzkoako Foru Aldundiak astelehen arratsaldean Aldundiaren Jauregian. Perez Marcosek autobusean zihoala bihotzekoa izan zuen emakume bat salbatu zuen azaroan. Egindakoa eskertu eta aitortu zioten Mugikortasun, Turismo eta Lurralde Antolaketa diputatu Azahara Dominguezek eta Mugikortasun Jasangarri sailburu Susana Garcia Chuecak, senide eta lankideen aurrean egindako ekitaldian.
Perez Marcosek oso hunkituta eskertu zuen omenaldia, eta garraio publikoaren sektorean lan egiten duten guztien lana goraipatu zuen.”Autobus gidarien gremio honetan lan egiten dugun guztiok oso arduratsuak gara eta badakigu zer daramagun esku artean. Edozein larrialdi-egoeratan, gure esku dagoen guztia egiten dugu, ahal denaren barruan. Horregatik, gu guztion lana nabarmendu nahi dut”.
Gertakaria azaroaren 15ean jazo zen. Isabel Perez Marcos Zumaia eta Donostia lotzen dituen UK10 lineako 7:45eako zerbitzua ematen ari zen. Donostiara iristerakoan, unibertsitate eremuan zegoela, ohartu zen erabiltzaileetako baten konortea galdu zuela. Bizi-konstanteak hartu eta pultsurik ez zuela ohartzean, autobusa hustu eta bihotz-biriketako bizkortze maniobra egin zion anbulantzia iritsi arte, eta erabiltzailea egonkor eraman ahal izan zuten Donostia Ospitalera.
Hori azalduta, diputatuaren esanetan, “bidezkoa da” aitortza egitea, “modu heroikoan” jokatu baitzuen. “Zalantzarik gabe, izandako erantzun azkarra, tentsio goreneko una batean izan zuen lasaitasuna eta erabakiak presiopean hartzeko gaitasuna funtsezkoak izan ziren tragedia saihesteko. Izan ere, zalantzarik gabe esan dezakegu egun hartan Isabelek salbatu zuela bidaiari haren bizitza”. Ildo beretik, Garcia Chuecak “eredugarria” dela adierazi zuen eta nabarmendu zuen garrantzitsua dela bai enpresek lehen sorospenetako prestakuntza sustatzea bai desfibriladoreak instalatzea gune estrategikoetan edo jende asko biltzen duten guneetan.
