Bihotz-biriketako bizkortze teknikak irakatsiko dituzte hiriko ikastetxeetan
Udalak, DYA eta Gurutze Gorriarekin elkarlanean, 22 ikastetxetan aurrera eramango duen ikastaroan 1.300 ikaslek parte hartuko dutela aurreikusten dute.
Hiriko 22 ikastetxeetako ikasleek parte hartuko dute aurten ikastaroan.Donostiako Udala 
Beste urte batez, Donostiako Udalak, DYA eta Gurutze Gorriarekin elkarlanean, bihotz-biriketako bizkortzeari buruzko ikastaro bat antolatu du DBHko 4. mailako ikasleentzat. Aurten, 22 ikastetxetan aurrera eramango dute eta 1.300 ikaslek parte hartuko dutela aurreikusten dute. Saio teoriko baten ondoren, praktikatzeko aukera izango dute.
Osasun Publiko zinegotzi ordezkari Iñigo Garciak azaldu duenez, “bihotz-biriketako geldialdia osasun publikoko arazo bat da. Kontuan izan behar da horrelako geldialdien % 80 ospitaletik kanpo gertatzen direla eta geldialdi baten lekuko izan daitezkeen pertsonen % 25ek baino ez dakiela horrelako egoera batean behar bezala laguntzen”. Hori dela eta, biziraupen tasak igotzeko, “funtsezkoa” da herritarrei prestakuntza ematea horrelako egoeretan laguntzeko. Hain zuzen ere, hori da ikastaroaren xedea, “berpizteko teknikei eta desfibriladoreen erabilerari buruzko prestakuntza egokia” ematea eta ohartaraztea halako egoeretan esku hartzea “denon erantzukizuna dela, ez zerbitzu sanitarioena soilik”.
Aurreko urteetan positibotzat jo dutenez, otsailean eta martxoan udalak prestakuntza saioak eskainiko dizkie ikastetxeei. Iaz, ikasleen % 85ek baino gehiagok adierazi zuen ikastaroa gustatu zitzaiola eta % 92k ulertu zuen erabilgarria izan zitekeela gerta daitezkeen geldialdietan laguntzeko. Ikastaroaren metodologiak, baita iraupenak zein edukiek ere, batez beste 9,5eko balorazioa jaso dute ikasleengandik.
