'Emakume zientzialarien argitan' solasaldi zikloak klima aldaketa, osasuna eta agroekologia jorratuko ditu
Mirene Begiristain ekonomian doktorea da.Elhuyar Elhuyarrek eta Donostia Kulturak elkarlanean antolatutako Emakume zientzialarien argitan solasaldi zikloa itzuliko da 2025eko udaberrian. Hiru saio eskainiko dituzte: martxoaren 25ean, apirilaren 29an eta maiatzaren 20an, 19:00etan, Ernest Lluch Kultur Etxeko areto nagusian.
Ziklo honen helburua emakume zientzialarien lana ezagutzera ematea da, zientzia eta teknologiaren historian emakumeek izan duten ekarpena askotan ikusezina izan baita. Aurrez aurreko elkarrizketen bidez, interes sozial handiko gaiak jorratuko dituzte hiru hizlarik: Elisa Sainz de Murieta Zugadik, Miren Basaras Ibarzabalek eta Mirene Begiristain Zubillagak. Solasaldiak Ana Galarraga Aiestaranek gidatuko ditu.
Aurtengo hizlariak
Lehen saioan, martxoaren 25ean, Elisa Sainz de Murieta Zugadik klima larrialdiari buruz hitz egingo du ikuspegi sozioekonomikotik. Geologoa eta ikertzailea da, eta klima aldaketaren ondorioak eta egokitzeko neurriak aztertzen ditu BC3 zentroan eta EHUn.
Bigarren saioa apirilaren 29an izango da, eta Miren Basaras Ibarzabal mikrobiologoak osasunaren eta planetaren osasunaren arteko lotura azalduko du. EHUko irakasle eta ikertzailea da, eta zientzia gizarteratzeko egiten duen lanagatik hainbat sari jaso ditu, hala nola CAF-Elhuyar Merezimendu saria.
Hirugarren saioan, maiatzaren 20an, Mirene Begiristain Zubillagak elikadura-burujabetzari buruz hitz egingo du, agroekologia eta feminismoaren ikuspegitik. EHUko Ekonomia eta Enpresa Fakultateko irakasle eta ikertzailea da, eta elikadura sistemak aztertzen ditu Euskal Herriko esperientzia kolektiboetan parte hartuz.
Hitzaldi guztiak euskaraz izango dira, eta entzun ahal izango dira Donostia Kulturaren DK Irratian eta Elhuyarren Emakume zientzialarien argitan podcastean.
