Ainhoa Ostolaza eta Igor Gonzalez de Galdeano omenduko ditu DBD martxa zikloturistak
Igor Gonzalez de Galdeano eta Ainhoa Ostolaza, DBD martxa zikloturistak aurten omenduko dituen txirrindulari ohiak.Irutxuloko Hitza 
Maiatzaren 10ean egingo dute 23. Donostia-Baiona-Donostia martxa zikloturista (DBD), Bera Bera klubak antolatuta. Urteroko legez, bi txirrindulari historiko omenduko ditu probak, eta, aurten, Ainhoa Ostolaza Etxaniz urnietarra eta Igor Gonzalez de Galdeano gasteiztarra izango dira omenduak.
Ostolaza 1990eko hamarkadan aritu zen maila profesionalean lehiatzen eta palmares zabala du. Bere lorpenen artean, nabarmentzekoak dira Munduko Txapelketetan domina bat eskuratu zuen estatuko lehenengo emakumea izan zela eta hainbat urtetan irabazi zituela Espainiako abiadura, puntuazio, errepide eta jazarpen txapelketak.
Gonzalez de Galdeanori dagokionez, 1990eko hamarkadaren amaieran eta XXI. mendearen hasieran aritu zen buru-belarri profesionaletan eta palmares zabala du berak ere. Lorpen esanguratsuenen artean daude Espainiako Vueltako hainbat etapa irabazi izana, txapelketa horretako bigarren postua eskuratu izana 1999an eta Frantziako Tourrean bosgarren gelditu izana 2001ean eta 2002an —azken urte horretan, sei egunez eraman zuen maillot horia—, besteak beste.
1.500 parte hartzaile
DBD martxa arrakastatsuak 1.500 parte hartzaile inguru izan ohi ditu urtero, eta, aurten ere 1.000tik gora zikloturista arituko dira maiatzaren 10ean bi omenduekin batera. Hain zuzen ere, dagoeneko 1.000 izen-emateetara iritsi da martxa, eta epea irekita dago oraindik. Grosetik aterako dira parte hartzaile guztiak, baita bertan bukatu ere; ibilbide laburra egiten dutenek 82 kilometroko martxa egingo dute eta luzea egiten dutenek 121 kilometrokoa, eta denek Jaizkibel mendia bi aldiz igo eta jaitsi beharko dute.
Iaz, Marino Lejarreta eta Arantzazu Lekuona txirrindulari historikoak izan ziren omenduak, eta giro apartaz disfrutatu zuten parte hartzaile guztiek, beraiekin batera.
