Atano III.a pilotalekuan bi partida esanguratsu jokatuko dira
Igandean, Binakako Txapelketako finalerdietako ligaxkako norgehiagoka erabakigarria hartuko du hiriko frontoiak.
Ezkurdia-Rezusta eta Laso-Iztueta bikoteak aurrez aurre ariko dira igandean, Atano III.a pilotalekuan.Aspe Donostiako Atano III.a frontoia berriro ere pilota egutegian garrantzitsua den plaza bihurtuko da, igandetik aurrera. Aspe enpresarekin batera, egitarau interesgarria prestatu dute. Horrela, igande honetan, hilaren 16an, Binakako Txapelketako finalerdietako ligaxkako partida erabakigarria jokatuko da Donostiako frontoian. Ezkurdia-Rezusta eta Laso-Iztueta bikoteak ariko dira aurrez aurre. Maiatzean, berriz, Buruz Buruko txapelketaren finalerdi bat hartuko du Atano III.ak.
Donostia Kirolak 2024ko martxoan Donostia Pilota programa abian jarri zuen, eta horren bidez, hirian pilota sustatzeari ekin zioten. “Donostia pilotaren lehen urte honen balantzea oso ona da, ez bakarrik Donostia Kirolarentzat, baizik eta agente laguntzaile guztientzat, eta baita zaleentzat ere, Atanon erantzun bikaina eman baitute. Horregatik, indartu egingo dugu gure apustua eta are baliabide gehiago bideratuko ditugu 2025ean, pilotak Donostian distira izan dezan, merezi duen bezala”, nabarmendu du Iñaki Gabarain Kiroletako zinegotziak.
Aipaturiko bi partidez gain, Atano III.a pilotalekuan jokatuko dira Buruz Buruko final-laurdenetako ligaxkako partida bat, Lau t’erdiko San Fermin Txapelketako bi finalerdiak eta Caixabank Master Txapelketako partida berezi bat. Bestalde, abuztuko Donostia Hiria Txapelketako hiru jardunaldiak ere hiriko frontoian jokatuko dira.
