Donostian estreinatuko dute Aberri Egun bateratua aldarrikatzeko kultur ikuskizuna
Euskara izango da Kursaalean egingo duten kultur ikuskizun bereziaren ardatza, eta sarrerak eskuragarri daude dagoeneko.
2025eko Aberri Egun Bateratura begirako aurkezpena, Donostian.Euskal Herria Batera 
Euskal Herria Batera ekimen herritarrak Aberri Egun Bateratua aldarrikatuko du aurten ere, baina “jauzi” bat emango dute, antolatzaileek nabarmendu dutenez: “Apirilaren 11an (19:00etan), ostiralarekin, Donostiako Kursaalean, hitzordu bateratu bat izango da, herri gisa elkartzekoa. Bederatzi egun lehenago, Aberri Egunera eramango gaituen astea zabaldu nahi dugu ekitaldi berezi eta indartsu batekin”. Kultur ikuskizun bat izango da ekitaldiaren oinarria, egun horretan estreinatuko dutena eta euskara ardatz izango duena. Sarrera doakoa izango da, baina aurrez erreserba egin behar da, eta esteka honetan egin daiteke hori.
Ikuskizun artistiko horretan, hainbat sortzaileren pentsaera eta ideia eszenikoak batuko dira, eta han izango dira, besteak beste: Manex Fuchs, Lorea Agirre eta Martxel Rodriguez. “Ekitaldi honen garrantzia azpimarratu nahi dugu, duen zentzua, eta egiteak berak igortzen duen mezua. Batez ere, Aberri Eguneko momentu bateratu honen garrantzia nabarmendu nahi dugu. Aberri Eguna ospatzea ezinbestekoa da guretzat, nazio baten parte izatearen harrotasuna eta ospakizun eguna. Aberri Eguna nazioa garela ospatzeko eguna da, beste ezeren gainetik. Euskal nazioa badela adierazteko eguna”, nabarmendu dute Euskal Herria Baterako kideek.
Ikuskizunaren nondik norako batzuk azaldu ditu Fuchsek: “Saiatuko naiz bi hitzez erraiten agertuko dugun ekitaldi horrek zer eskainiko duen. Esaldi bakarrean esan daiteke: ‘Euskaldunon aberria euskara da’. Euskara da gure aberria, hori esatera goaz”. Halaber, edukiaren inguruko aurrerapen txiki bat egin du: “Erran dezakedana da Lorea Agirrerekin testu bat idatzi dugula; Martxel Rodriguezek dantzari taldetxo bat bilduko du eta baita kantari eta zenbait antzezle ere izango dira ekitaldi horretan. Izenik ez dizuet errango eta ez dizuet errango zehatz zer ikusiko duzuen, horrela sorpresa mantenduko nahi dugu eta ikusmina ea areagotzen duen horrek, baina bai txirikordatuko ditugula euskal arte dramak dituen hiru adierazmolde: bata dantza dela, bestea hitza
oholtzara eramatearena eta hirugarrena kantuarena”.
“Ekitaldi honek mezu bat igorriko die euskal gizarteari eta munduari: hemen bada herri bat, askotariko ezberdintasunekin, bere nortasunarekiko eta etorkizunarekiko konpromisoa azaldu nahi duena. Bagara eta izan nahi dugu”, gaineratu dute Euskal Herria Baterako kideek.
Ahalik eta jende gehien ekitaldira joatea nahi dute antolatzaileek, eta, horregatik, autobusak antolatu dituzte ekitaldi egunerako: Gasteiztik 16:15ean aterako da eta Arrasaten geldituko da
16:50ean, Iruñetik 16:40ean, Bilbotik 16:40ean eta Baionatik 17:00etan.
Euskal Herria Batera, 2020tik
2020ko Aberri Egunaren testuinguruan sortu zen Euskal Herria Batera: “COVID-19aren pandemiaren ondorioz, etxean konfinatuta geundela, komunitate sentimendua indartu nahi izan genuen, Aberri Egunean herri gisako momentu bat eskainiz”, gogorarazi dute kideek.
Ordutik, urtez urte aldarrikatu dute Aberri Egun Bateratua: “2021ean, Aberri Eguna berriz ere batera ospatzeko deialdia egin zuten, baina orduko hartan herri guztietako plazetan; 2022an, Aberri Egunaren bezperan egin zuten ekitaldia, Urruñan, Antton Abadiak 1851n bultzatutako lehen Lore Jokoak ospatu zituzten toki berean; 2023an, Ukrainaren eta Errusiaren arteko gerrak Europa eta Euskal Herria astindu zituenean, Miramar Jauregian, Donostian, herri gisa bagarela eta badugula adierazi genuen; 2024an Bilboko Campos Eliseos Antzokian egin zen lehen Aberri Eguna, 1932an Bilbon EAJk deitu zuena. Askotariko ekitaldiak egin ziren, horien artean Campos Eliseos antzokian egindakoa; horregatik erabaki genuen iazkoa bertan egitea”.
“Asko gara hainbat eremutatik —instituzioak, arlo ekonomikoa, soziala, sindikala, politikoa edo kulturala— euskal komunitatearen oraina eta etorkizuna eraikitzen ari garenak. Eta Euskal Herriari etorkizun hobea emateko aski gaitasun dugula uste dugu”, gaineratu dute. Jarraian, aurkezpen ekitaldiko bideoa ikus dezakezue:
