Agitiko arrain haztegia desmuntatzeko eta kala lehengoratzeko eskatu dio Eguzkik Eusko Jaurlaritzari
Gaur, apirilak 1, sartu da indarrean itsasertza kudeatzeko transferentzia, eta horrek, Eguzkiren arabera, "eskumenaren gainean egon zitekeen edozein zalantza argitzen du".
Agitiko arrain haztegi zaharra erabilerarik gabe dago.Eguzki 
Eguzki talde ekologistak iazko otsailean eskatu zion Espainiako Gobernuaren mendeko Kosta Zerbitzuari Igeldoko Agiti eremuko arrain haztegi zaharra desmuntatzeko eta bertako kala lehengoratzeko. Ordea, ekologisten arabera, erakunde horrek erantzun zien “arrain haztegiaren zati bat baino ez dagoela itsas lehorreko jabari publikoan; gainerakoa jabariaren babes zortasuneko eremuan dagoela. Eremu horretan, Jaurlaritzak omen du eskumena, ez Kosta Zerbitzuak. Eskumen kontua, nonbait”.
Ordea, gaur, apirilak 1, indarrean sartu da Espainiako Estatuak Euskal Autonomia Erkidegoari itsasertza antolatzeko eta kudeatzeko egin dion transferentzia eta, Eguzkiren ustez, horren edozein zalantza argitzen du eskumenei dagokienez: “Agiti leheneratzean, Jaurlaritzari dagokio lidergoa. Beste administrazioekin elkarlanean, beharbada, baina, zalantzarik gabe, berari dagokio bultzada”.
Era berean, Eguzkik eskatu du Culmanor SA enpresari, arrain haztegia eraiki zuenari, “legez dagozkion ardurak erreklamatzeko”: “Kostaldeei buruzko araudi orokorrak, 147. artikuluan, honako hau dio: ‘Emakida bat iraungitzen den kasu guztietan, Estatuko Administrazio Orokorrak erabakiko du obrak eta instalazioak mantentzea edo jabari publikotik eta haren babes zortasuneko eremutik jaso eta kentzea emakida jaso duenak berak, bere kontura'”.
2006tik erabili gabe
Eguzkik gogorarazi duenez, Culmanor SA enpresak 1989an eraiki zuen Agitiko arrain haztegia, 21.424 metro koadroko lursail baten gainean, “itsas lehorreko jabari publikoaren emakida bati esker”. Haztegiak, ordea, “2006an funtzionatzeari utzi zion eta emakida 2011n iraungi zen”, azaldu dute ekologistek.
“Haztegiak, dagoeneko, askoz urte gehiago pasatu ditu funtzionatu gabe (19) funtzionatzen baino (16). Aspalditik dago zeharo hondatuta, eta ez dugu ezagutzen inolako arrazoirik, ez legezkorik eta are gutxiago ingurumenezkorik, horrela izaten jarraitzeko. Izan ere, Ura agentziaren txosten batek garbi utzi zuen 2012an Agiti oso balio ekologiko eta paisajistiko nabarmena duen parajea dela eta leheneratzeko gaitasun handia duela”, gaineratu du Eguzkik.
