Apirilaren 2an zabalduko dute 60. Behobia-Donostiarako izen emateen lehen fasea
Ohiko parte hartzaileek eman ahal izango dute izena lehen fasean, eta izen emate orokorra maiatzaren 7an irekiko da.
27.722 parte hartzaile izan ditu aurtengo Behobia-Donostia lasterketak.Sara Ibarguren 
60. Behobia-Donostia lasterketarako izen emateen lehen fasea bihar, apirilak 2, zabalduko dute, Fortuna Kirol Elkarte antolatzaileak jakinarazi duenez. 12:00etatik aurrera, ohiko parte hartzaileek (azken bost urteetan hiru izen-emate) eman ahal izango dute izena, bost euroko deskontuarekin (50 euro).
Ohikoa parte hartzailea ez denak, Joma promozioaren (doako izen ematea, Joma Running R- familiako zapatila pare bat erostean), dortsal solidarioaren (izen ematea 55 euro + gutxienez zazpi euroko dohaintza) edo pakete turistikoaren (dortsala + ostatua) bidez izena eman ahal izango du. Lehen fase hau, apirilaren 2an hasi eta apirilaren 23an itxiko da. Bigarren fasea, izen emate orokorrarena, maiatzaren 7an irekiko da.
Berritasun gisa, izen ematea aldatzeko zerbitzua hobetzeko eta horren erabilera egokia bermatzeko asmoz, izen emate aldaketa webgunearen bidez egingo da, eta antolakuntzak berak tramitatuko du izen ematearen ordainketa eta ondorengo itzulketa. Bost euroko kostua izango du dortsala lagatzen duenarentzat. Honela, izen emate aldaketa egin ondoren, titular berriak izen ematearen kontrola izango du.
“Bestalde, Joma babesle tekniko ofiziala izateko akordio berriaren ondorioz, Behobia-Donostia lasterketako kamisetak Joma markakoak izango dira, beraz, kamiseten neurriak lehengo urtekoekin konparatuta desberdinak izango dira, eta webgunean argitaratua dagoen informazioa begiratzea aholkatzen dugu aukeraketa egin baino lehen”, ohartarazi dute antolatzaileek.
50/50/25 proiektua
Fortuna Kirol Elkarteak 2018an hasi zuen 50/50/25 proiektuaren urte esanguratsua izango da aurtengoa, eta “bultzada berezia” emango diote lasterketan emakumeek duten presentzia normaltasun batera “ahalik eta azkarren” iritsi dadin.
“Dagoeneko ikusten ari gara gure inguruko distantzia motzagoko beste lasterketetan lortzen ari dela helburu hau, eta deialdi berezia egiten dugu emakumeek izena eman dezaten, distantzia handiagoetan gizarte aldaketa hori ere eman dadin epe laburrean”, adierazi dute antolatzaileek.
