Errondogaina II guneko plan partziala onartu du udalak
30.537 metro koadroko lurzoruan 96 etxebizitza libre egitea aurreikusi dute.
Gorriz, 'Errondogaina II' proiektuaren azalera. Urdinez, urbanizazio eremu berriaren sarbidea.Irutxuloko Hitza 
Udal gobernuak behin betiko onartu du Errondogaina II sektorearen plan partziala. 3,054 hektareako azalera duen lurzoru urbanizagarri hori antolatzen du txostenak eta barne hartzen du “96 etxebizitza egiteko aurreikuspena” hiri antolamendu plan orokorraren (HAPO) araberako baldintzetan eta “estandar urbanistikoak jarraituz”.
Plan partzialak zortzi bizitegi eraikin altxatzeko proiektua jasotzen du, bakoitza lau solairukoa; bertako etxebizitzek, aldiz, 120 metro koadro eta hiruzpalau logela izango dituzte. Gainera, etxebizitza guztiak libreak izango dira.
Eremua urbanizatzeko asmoa ez da berria, 1995eko HAPOk, jada, aurreikusten zuen eremu horren garapena. Orduko hartan, familia bakarreko 61 etxebizitza aurreikusi zituzten, 2003an, aldiz, hiru solairuko blokeengatik aldatu zituzten.
