'Ez goaz inora' EP-a argitaratu du Putas amak talde donostiarrak
'Ez goaz inora' EP-a argitaratu du Putas amak taldeak. 
Putas amak taldeak Ez goaz inora EP-a argitaratu du, eta entzungai dago plataforma digitaletan. Putas amak, Egia auzoan bizi diren hiru emakume (ama) dira; Lorea, Oiane eta Nahikari. 2021ean sortu zuten musika taldea, eta geroztik hainbat proiektutan aritu dira. Horien artean, taldearen izen berbera duen podcasta sortu zuten, eta Dadadaba aretoan eta Tabakalerako prisman kontzertuak eskaini dituzte.
Orain, pauso berri bat eman, eta estudioan grabatu ondoren, Ez goaz inora EP-a plataforma digitaletan jarri dute entzungai. Zazpi kanta jasotzen ditu proiektuak: Ez goaz inora, Teknoerrua, Maitia, Kantu generikoa, Kontuz, Contacto visual eta Kunbia zikina.
Plaza Haundi, azalean
EP-aren azalean Egiako Plaza Haundi ageri da, eta honela azaldu dute erabaki hori: “Egun, gure bizitzako arratsalde gehienak bertan igarotzen ditugu. Gure umeen espazioa gure espazioa ere bihurtu da, eta ez goaz inora“. Irudian, kaosaren zarata ageri da izkina guztietatik. “Elementu, marra eta itzal ugari daude, baina,
istilu horretan argia ere badaukagu”, adierazi dute.
“Bad Bunnyk Debi tirar mas fotos diskarako aulki bi jartzen baditu oihanean, guk aulki bakarrari egiten diogu argazkia gure plazan. Aulki hori, ordea, banku luzeez inguratuta dago, gu komunitate baten parte garela azalduz”, gehitu dute.
Hona hemen Dabadabako kontzertuaren laburpen bideoa.
