9.650 pertsona artatu ditu Gizakia Helburu proiektuak 40 urteko historian
Gizakia Helburu proiektuaren egoitza, Ulian.Izan fundazioa 
Gizakia Helburu Gipuzkoa proiektuak 40 urte bete ditu, eta prentsaurrekoa egin dute gaur Donostian, bere ibilbidearen inguruko datuak emateko. Azaldu dutenez, mendekotasunen bat izan duten 9.650 pertsona artatu dituzte orotara. Erabiltzaile horietatik, %77,4 gizonezkoak izan dira, eta %22,6 emakumezkoak.
Pertsona horien 12.500 senide edo bikote pasatu dira Gizakia Helburu proiektutik, eta gehienak (%69,3) emakumezkoak izan dira (%30,7 gizonezko). Orotara, 390 boluntario izan ditu proiektuak, eta 195 langile.
Artatutako pertsona gehienak 2015-2024 aldian artatu dituzte (3.563 erabiltzaile), eta adikzio nagusia alkohola izan da aldi horretan (%36,4). Adinari dagokionez, gizonezkoen batezbestekoa 40,93 urte da, eta emakumezkoena, aldiz, 46,50 urte (2024ko datuei erreparatuz).
Izan fundazioa
1984an eratu zen Izan fundazioa, eta hurrengo urtean, 1985ean, jarri zuten martxan Gizakia Helburu proiektua. Beste hainbat sariz gain, 1992an, Donostiako Udalak ematen duen Hiritarren Merezimenduaren Domina jaso zuen Gizakia Helburu proiektuak. 2017an, Izan fundazioa Gizarte Intereseko Erakunde izendatu zuten.
40. urteurrena ospatzeko ekitaldia
Maiatzaren 30ean ospatuko dute Gizakia Helburu proiektuaren 40. urteurrena, Hernaniko Orona enpresako auditorioan (Galarreta parke teknologikoa). 09:00etatik 17:30era, adikzioen inguruko hainbat hitzaldi eskainiko dituzte adituek, eta izen ematea esteka honen bidez egin daiteke.
