Dantzaren hilabetea abiatuko dute asteburuan
Barra klasikoaren erakustaldia, Kontxako barandan.Donostia Kultura 
Asteburuan abiatuko da Dantzaren Hilabetea, XVII. Dantza Kalean eta XXVII. Kontxako barandaren erakustaldiaren jarduerekin. Gipuzkoako Dantza Profesionalen Elkarteak (APDG) Donostian antolatu ohi duen hilabetea maiatzaren 4an borobilduko dute, Dantzaren Nazioarteko Eguneko XXVIII. Galarekin.
Larunbatean, hilak 5, Alderdi Ederren XVII. Dantza Kalean saioa egingo dute. Hamahiru eskoletako 281 dantzarik parte hartuko dute hainbat estiloko piezak interpretatuz: dantza garaikidea, jazza, neoklasikoa, urbanoa, aurredantza eta street jazza.
Igandean, hilak 6, XXVII. Kontxako barandaren erakustaldiaz gozatu ahal izango da, Kontxako pasealekuan. 31 irakasleren Gipuzkoako eta Bizkaiko eskoletako 1.476 ikaslek parte hartuko dute.
Dantzaren Hilabeteari bukaera emateko, maiatzaren 4an, 12:00etan eta 19:00etan, Dantzaren Nazioarteko Egunaren XXVIII. Gala ospatuko da Viktoria Eugenia antzokian. Besteak beste, Ion Agirretxe, Cristina Casa, Alejandro Polo eta Gaizka Morales (horiek guztiak, Espainiako Dantza Konpainia Nazionalekoak), Mikel Arana, Uikan Dantza eta Real Conservatorio Profesional de Danza Mariemma konpainiek parte hartuko dute.
Gipuzkoako Dantza Profesionalen Elkarteak (APDG) Gorka Duran eta Alberto Sagardia saritzea erabaki du aurten. Gorka Duranek, 2025eko Errebelazio Saria jasoko du eta Alberto Sagardiari aipamen berezia egingo diote. Sari-emate ekitaldia galan bertan egingo da. Galarako sarrerak Viktoria Eugenia antzokiko eta Antzoki Zaharreko leihatiletan eta webgunean eskura daitezke.
