EH Bilduk salatu du udal gobernuak ez duela Loiolako kale berriak izendatzeko batzorderik antolatu
Loiolako Lorategi Hiriaren simulazioa.Urumea Berri 
Eneko Goia alkateak astearteko prentsaurrekoan azaldu zuenez, Donostiako Udaleko Tokiko Gobernu Batzarrak oniritzia eman zien Hirigintza batzordeak onartutako proposamenei, Loiolako Lorategi Hiriko kale berrien izenak erabakitzeko. Ordea, EH Bilduk salatu du udal gobernuak legealdi honetan oraindik ez duela elkartzera deitu kaleak izendatzeko batzordea.
Hori dela eta, hilaren 10eko Lurralde Garapen eta Planifikazio Batzordean eztabaidatzeko interpelazio bat aurkeztu du, Nekane Arzallus Hirigintza zinegotziak erantzun dezan. Zehazki, oposizioko udal taldeak galdetuko du ea zergatik ez duten oraindik Kaleak Izendatzeko Batzordea elkartzera deitu, ea nork erabaki dituen kale berri horien izenak eta ea udal gobernuak asmorik duen aipaturiko batzordea elkartzera deitzeko.
Lorategi Hiria, Marea Erreka, Lopetedi, Romana Zubiria, Erreka Mari, Luis Murugarren eta Jose Migel Zumalabe dira kale berrien izenak. Horrez gain, Goiak iragarri zuen Josetxo Mayor izena jarriko diotela Uliako plater tiroaren eraikin zaharraren ondoan dagoen parkeari.
