'Euskal emakume zinemagileak' zikloaren azken edizioak zuzendari gazteenen hamabi film proiektatuko ditu
'Euskal emakume zinemagileak' zikloaren bosgarren eta azken edizioaren aurkezpena, Tabakaleran.Euskadiko Filmategia 
Euskal emakume zinemagileak zikloaren bosgarren eta azken edizioak zuzendari gazteenen (hots, 1980ko eta 1990eko hamarkadetan jaiotakoak) hamabi film programatuko ditu apiriletik ekainera bitartean. Horrela, Euskadiko Filmategiak 2021ean abiarazi zuen proiektu bat itxiko da. Gaur Tabakaleran egin duten aurkezpenean azaldu dutenez, proiektu horren bitartez, euskal zinemaren egoera “modu erabakigarrian” eraldatzen lagundu duten 50 zuzendari baino gehiagoren lana aitortu nahi izan da bost urte hauetan. Aurten, lehen aldiz, fikziozko lanen kopuruak ia dokumentalena berdindu du.
Bost zikloetako batean parte hartu duten hogei zuzendari baino gehiago izan dira gaurko prentsaurrekoan (Mireia Gabilondo, Mirentxu Purroy, Ione Hernandez, Yolanda Mazkiaran, Rosa Zufia, Helena Bengoetxea, Estela Ilaraz, Jone Karres, Enara Goikoetxea, Iurre Telleria, Lara Izagirre, Ainhoa Gutierrez del Pozo, Aitziber Zapirain, Maria Elorza, Maite Ruiz de Austri, Nerea Sciarra, Tamara Lucarin, Olatz Gonzalez de Abrisketa, Tamara Garcia Iglesias, Aizpea Goenaga, Zuriñe Goikoetxea eta Ainhoa Andraka).
Euskadiko Filmategiaren zuzendari Joxean Fernandezek adierazi duenez, ziklo honek hiru helburu izan ditu: “Euskal emakume zinemagileen talentua Filmategiaren pantailetan erakustea, eurek aurkeztea beren lanak eta hitz egitea publikoarekin, eta, horrekin guztiarekin batera, ikerketa akademiko bat egitea haien historiari eta haien filmografiaren garapenari buruz”.
Bosgarren edizioaren hasiera
Bihar, apirilak 3 (osteguna), hasiko da zikloa Gasteizen; apirilaren 4an (ostirala) Donostian; eta apirilaren 5ean (larunbata) Bilbon. Fikzio hauetako bat proiektatuko da: 20.000 especies de abejas (Estibaliz Urresola, 2023) Berlinalean saritu zuten, eta mutiko baten gorputzean harrapatutako neskato baten istorioa kontatzen du. Nina (Andrea Jaurrieta, 2024) Malagan saritu zuten, eta mendeku baten istorioa da; Patricia Lopez Arnaiz du protagonista. Urrezko Maskorra irabazi aurretik, Jaione Cambordaren lehenengo film luzea Arima (2019) izan zen. Galiziako herrixka batean gertatzen den istorio ilun bat kontatzen du. Bestalde, Un otoño sin Berlin (2015) filmean, Lara Izagirrek neska bat aurkezten digu: kanpoan luze egon ondoren, etxera itzultzen da, bikotekide ohiaren maitasuna berreskuratzeko asmoz. Azkenik, Paradise Hills (Alice Waddington, 2019) Sundancen hautatu zuten, eta, besteak beste, Milla Jovovich du protagonista. Istorio distopiko bat da, non gizonak zerbitzatzeko hezten baitira emakumeak.
Dokumental gehienek fikzioaren berezko baliabideak ere erabiltzen dituzte. Hona hemen dokumentaletako batzuk: Enero (Ione Atenea, 2019), zuzendariaren bi amonen erretratua; Polaris (Ainara Vera, 2022), bi ahizpen arteko harremana, zeinek ingurune oldarkorretan bizirauten baitute: Groenlandian eta gizonena baino ez den nabigazioaren munduan; Young & Beautiful (2018), Marina Lameirok bere inguruko pertsonen bizitza eta irrikak ezagutzeko egiten duen proposamena; Pizti bat, agian (Ainhoa Gutierrez del Pozo, Olatz Gonzalez Abrisketa, 2023), zeinak desagertzear dagoen mundu batera hurbiltzen baitu ikuslea, landa-mundura; Las letras de Jordi (Maider Fernandez Iriarte, 2019), garuneko paralisia duen eta jainkoak jada hitz egiten ez diola sentitzen duen gizon baten istorioa; A los libros y a las mujeres canto (Maria Elorza, 2022), epikarik eta armarik gabeko erresistentzia baten kontakizuna; eta Arduraz komunika dezagun (Aitziber Zapirain, 2021), hedabideetako euskarari eta genero-indarkeriari buruzko hausnarketa.
Zuzendari gehienek Donostian, Gasteizen eta Bilbon aurkeztuko dituzte filmak, eta Tabakaleraren, Artium Museoaren eta Arte Ederren Bilboko Museoaren leihatiletan eta webguneetan eskuratu ahal izango dira sarrerak.
Hemen ikus daiteke programazioa osorik.
