Euskal portuetako amarralekuen «blokeo» egoera konpontzeko eskatu du PPk
Donostiako kaia.Inaxio Esnaola 
PPk gogor kritikatu du hiriko kirol portuko amarralekuen krisia, eta “dimisioak” eskatu ditu Euskadiko Kirol Portua sozietate publikoan “antzemandako 300 irregulartasunen eta irekitako 80 prozedura judizialen aurrean”. Horrez gain, erabiltzaileekin irtenbide negoziatu bat eskatu du esleipen prozedura berri bat ezartzeko.
“Lau urte bete dira blokeoa ezarri zenetik euskal kirol-portu guztietan, eta, bereziki, Donostiakoan. 3.000 eskatzaile baino gehiago daude itxaron zerrendan, plaza hutsak dauden bitartean. Kudeaketa txarraren biktimak dira”, azaldu dute PPko Ana Morales legebiltzarkideak eta Borja Corominas PPren Donostiako bozeramaileak.
Martxoaren 7an Eusko Jaurlaritzak esleipen prozedura aurten aldatzeko konpromisoa hartu bazuen ere, PPk uste du konpromiso zehatzagoak behar direla. Bihar, PPren mozio bat eztabaidatuko da Eusko Legebiltzarrean, amarralekuak esleitzeko prozedura berria “hiru hilabetetan” argitaratzeko.
PPk Donostiako erabiltzaileekin “adostutako irtenbide bat” eskatu du auziarekin amaitzeko, eta azken hamarkadako irregulartasunengatik EKPn “erantzukizunak argitzea” eskatu du.
