Lehiakortasuna hobetu eta iraunkortasuna sustatzeko plana osatu du Donostia Sustapenak
Ostalaritzari, ostatuei eta sektoreari lotutako beste enpresa batzuei bideratuta dago; Europako Batasuneko funtsek finantzatutako 600.000 eurotik gora baliatuko ditu.
Donostia Sustapenak Berreskuratze, Eraldaketa eta Erresilientzia Planaren barruan, zerbitzu, programa eta laguntza sorta bat osatu du lehiakortasuna hobetzeko eta ostalaritzaren, ostatuen eta sektoreari lotutako beste enpresa batzuen iraunkortasuna sustatzeko hirian. Europako Batasuneko funtsek finantzatuta, 600.000 eurotik gora bideratuko ditu, hiri ekonomiaren garapen arduratsua bultzatzeko eta enpresei eredu iraunkorragoetara eraldatzen laguntzeko konpromisoaren barruan.
Eskuragarri egongo diren laguntzak honakoak dira.
- Energia-eraginkortasuneko inbertsioetarako laguntzak. Energia kontsumoa murriztea, garapen ekonomiko arduratsua eta gizarte ongizatea bermatzen dituzten neurrietarako. Zehazki: Berotzeko, girotzeko, hozteko, aireztatzeko eta ur bero sanitarioko instalazio termikoetan energia eraginkortasuna hobetzeko eta energia berriztagarriak erabiltzeko jarduketak.
- Argiztapen instalazioen energia eraginkortasuna hobetzeko jarduketak.
- Autokontsumo eta biltegiratze jarduerak energia-iturri berriztagarriekin (fotovoltaikoa).
Proiektu bakoitzak gehienez 35.000 euroko laguntza jasoko du, eta diruz lagun daiteke gehienez gastuen %70; %80 enpresa txikien eta mikroenpresen kasuan.
Halaber, ingurumena zaintzea bermatuko duten eta enpresen hazkundea bultzatuko duten neurriak ere babestuko dituzte. Hain zuzen ere, helburu hauek dituzten sistema edo ekipamenduak ezartzea:
- Instalazioetan birziklatze eta konpostatze prozesuak erraztu eta hobetzea.
- Erabili eta botatzeko plastikoen erabilera murriztea eta aukera iraunkorrak sustatzea.
- Elikagaien hondakinak eta galerak murriztea.
- Berrerabiltzea eta birziklatzea lehenestea, ezabatzea baino.
Kasu horretan, laguntza, gehienez, 25.000 eurokakoa izango da, eta diruz lagun daiteke gehienez gastuan %70, %80 enpresa txikien eta mikroenpresen kasuan.
Laguntza horiez gain, honakoak ere eska daitezke Donostiako Sustapenaren webgunean.
- Ibilgailu elektrikoak kargatzeko puntuak jartzeko laguntzak: 20.000 euro arteko laguntza establezimenduetako azpiegiturak modernizatzeko, eta mugikortasun iraunkorra sustatzeko.
- Jasangarritasuna hobetzeko banakako plana: Hobekuntza-arloak identifikatzen dituen eta negozio bakoitzean jasangarritasuna optimizatzeko estrategiak taxutzen dituen neurriko programa.
- Karbono-aztarna kalkulatzeko zerbitzua: Funtsezko tresna da enpresek ingurumen eragina neur eta kudea dezaten, praktika ekologikoagoak hartzea erraztuz.
- Eraginkortasunari eta energia auditoretzei buruzko diagnostikoak: Instalazioen ebaluazio integrala, sektoreko establezimenduetan energia errendimendua hobetzera bideratutako proiektuak idatziz.
- Iraunkortasunari buruzko prestakuntza: Sektoreko profesionalak praktika iraunkorretan eta teknologia berrien ezarpenean prestatzen dituzten ikastaro eta tailer espezializatuak.
