Bizipoza Eguna ospatuko dute Egian maiatzaren 11n
Bizipoza egitasmoaren aurkezpena, atzo. 
Aniztasunaren aldeko Bizipoza Eguna ospatuko dute Egian maiatzaren 11n. Auzoko hainbat eragilek egin dute bat egitasmo hau prestatzeko, eta atzo egin zuten prentsaurrekoan azaldu zutenez, ia 40 dira egitasmora batutako erakunde eta gizarte eragileak.
“Es en Egia donde reina la alegría! dio duela hamarkada batzutako auzoko kantu herrikoiak. Bada, heldu da udaberria Egia auzora! Bizi-bizia, aniztasunaren aldeko ekimenak zein eragileek ekarpen handia egiten diote auzotarren egunerokoari”, adierazi zuten.
Bizipoza Egunean, Egiako plaza eta kaleak jarduera desberdinekin eta egun osoko egitarauarekin bete nahi dituzte, eta maiatzeko lehen astean batuko dira eragileak egitaraua osatzeko.
Bestalde, apirilaren 11n, ostirala, opor aurreko topaketa egingo dute Egia auzoko lau ikastetxeak plazan batuta: Aitor ikastola, Maria Reina, Lauaizeta eta Presentacion de Maria ikastetxeak batuta, hain zuzen ere.
Honakoak dira Bizipoza egitasmoarekin bat egin duten erakunde eta eragileak: Haurtxokoa, Gaztelekua, Egia haurgunea, Antxeta, Haurralde, Hezten, Sexugune, Eihera eta Latxaga eta Sibilia guraso elkarteak; Ongi Etorri Eskolara, Egia Zeinuka eta Egia euskaraz; Tabakalera, Kulturetxea, Teila fabrika eta Gordegia kultur erakunde eta eragileak. Txondorra, Porrontxo jai batzordea, Algaraklown eta Kantujira ere ariko dira; Txokoberri eta Egiatarrak jubilatu elkarteak, TAU frantziskotarrek, Egia Bizirik auzo elkarteak eta Azoka Txikia. Kirol alorrean, Kostkas, Egia eskubaloia, Egia Alai eta Trebeska eta Aitzarte dantza eta mendi taldeak. Eta baita Guztiontzako Egia, SOS Arrazakeria eta Kaleko afari solidarioak ere. IRUTXULOKO HITZA ere Bizipoza egitasmoaren parte izango da.
