Immigrazioa delinkuentziarekin ez erlazionatzeko «neurri instituzionalak» bultzatzeko eskatu die KASek udaleko alderdiei
KASeko hainbat kide gaurko prentsaurrekoan, Ijentea kalean.Sara Ibarguren 
Kaleko Afari Solidarioak (KAS) ekimeneko kideak udaleko alderdi politiko guztiekin elkartu dira, adierazpen instituzional bat eskatzeko asmoz. Alderdi guztiei idatzi bat pasatu zieten KASen arrazoiak eta kezkak adieraziz, eta adierazpen instituzional horrekin lortu nahi dutena azalduz. Bada, hain zuzen ere, idatzi hori aurkeztu du KASek gaur prentsaurreko batean, eta pertsonak “ez deshumanizatzeko” eta “xenofobia eta faxismoaren joera gero eta arriskutsuagoa alderantzikatzeko beharrezkoak diren neurri instituzionalak” bultzatzeko deia egin dute.
Idatziak jasotzen duenez, KASen ustez, iritsi zaio gizarteari xenofobiarentzako joera aldatuko duen “inflexio puntua” jartzeko unea. “Talde solidario ugari gara aspalditik ildo honetan lanean ari garenak, baina hausnarketa gure gizarteko esparru guztietara zabaldu behar da. Horregatik uste dugu ezinbestekoa dela gai hau Donostiako herritarren sentsibilizazio guztiak ordezkatzen dituen foro instituzionalean, udalbatzan, jorratzea”, azaldu dute.
Salatu dute “segurtasuna/segurtasun eza” kontzeptua dela hedabide gehienetan aurkitu daitekeena: “Askotan herritarrek hainbat hedabidetatik jasotzen dituzten mezuek delinkuentzia migrazioarekin lotzen dute zuzenean edo/eta subliminalki, eta, gainera, kolektibo batzuk estigmatizatu egiten dituzte beste batzuen gainetik”.
KASen iritziz, delituzko ekintzak bere horretan kudeatu behar dira, “baina ezin dira modu sentsazionalista edo alderdikoian erabili”. Horrekin lotuta, nabarmendu dute susmoa dutela “talde txiki batek afari guneak bere jarduera deliktiboan sortutako desadostasunak ebazteko erabil ditzakeela”. “Aldi berean, susmoa dugu eskuin muturreko mugimenduek bultzatu eta/edo finantzatu ditzaketela liskarrak, horrela baliabiderik ez duten pertsonei afaria ematea segurtasun gabezia efektuarekin lotzeko”, deitoratu dute.
Eskubideak “urratzen”
Era berean, salatu dute “ustezko segurtasunagatik” herritarren oinarrizko eskubideak urratzen ari direla. Gehitu dute “etengabekoa” dela Donostiara migratutako hiritargoak jasaten duen errugabetasun presuntziorako eskubidearen urraketa: “Eskubide hau erakundeek, polizia estamentuek eta abarrek urratzen dute. Baita hiritarrek orokorrean ere, izan ere migratzaileak migratzaile izate hutsagatik erruduntzat jotzen baitituzte”. Hori dela eta, “nahitaezkoa” iruditzen zaio KAS-i gorroto eta arrazakeria delituen aurkako protokoloari “etengabeko jarraipena” egitea.
KASek nabarmendu duenez, afariak emateak “pertsonak gizarteratzen” laguntzen du. “Gure iritziz, jantoki sozial bat abian jartzeak kohesio sozial handiagoa ekarriko luke, eta, ondorioz, ideia baztertzaileen hedapenaren aurrean bizikidetza balioak hobeto defendatzen lagunduko luke”, adierazi dute.
Adierazpen instituzionalaren beharra
Ekimeneko kideek udaleko alderdi politiko guztiei “adierazpen instituzional bat” adostu eta onar dezaten eskatu diete, “immigrazioa delinkuentziarekin ez erlazionatzeko, herritar guztien oinarrizko eskubideak defendatzearen eta ez urratzearen alde egiteko, pertsonak ez deshumanizatzeko eta xenofobia eta faxismorako joera gero eta arriskutsuagoa alderantzikatzeko beharrezkoak diren neurri instituzionalak bultzatzeko”.
Horrez gain, KASek eskatu du afarietara joaten diren herritarren segurtasuna bermatzea eta “beharrezkoak” diren baliabideak bideratzea afariak “beren probetxurako erabil ez ditzaten, ez ultraeskuin taldeek eta sare sozialetan gorrotoa sustatzen duten kanalek, eta ezta delinkuentzia taldeek ere”.
KASek jakinarazi duenez, alderdi politikoekin egindako bilerak ondo atera dira, eta momentuz, KASek ez die eskaera zehatzik egin, beraien kezkak alderdi politikoei helarazi baizik.
