Scientia Karmelo ikastetxeko langileen kaleratzea baliogabetu du EAEko Auzitegi Nagusiak
Scientia Karmelo ikastetxeko langileen elkarretaratze bateko artxiboko irudia.Nagore Garmendia 
2023-2024ko ikasturtearen amaieran, Amara Berriko Scientia Karmelo ikastetxea itxi zuten, ELA sindikatuak eta langileek orduan salatu zutenez, “irregulartasunez jositako kaleratze kolektibo bat planteatuta, 2024ko abuztuaren 31rako, ikastetxeko langile guztiak (40 langile) kaleratu zituen enpresak”. Kaleratzea kalte ordainik ordaindu gabe eta hainbat hilabeteetako zorra pilatuta gauzatu zuen enpresak eta, hori dela eta, helegitea aurkeztu zuen ELAk. ELAk aurkeztutako demanda onartuta, Scientia School taldea ere kaleratzeen erantzule solidarioa dela dio Sententziak.
Orain, sindikatuak jakinarazi duenez, EAEko Auzitegi Nagusiak arrazoia eman dio ELAri: “Sententziak kaleratze kolektiboa deuseztatu du. Scientia Karmelo eta Scientia School enpresak erantzule solidario direla adierazi du”, nabarmendu du sindikatuak. Gogoratu behar da langileek 36 greba egun eta hamarnaka mobilizazio egin zituztela.
