Soldata eta pentsio duinen alde aterako dira kalera larunbatean
Pentsiodunen manifestazio bat, artxiboko irudi batean.Olatz Balda 
Euskal Herriko Pentsiodunen Mugimenduak (EHPM) manifestazioak antolatu ditu Hego Euskal Herriko lau hiriburuetan larunbaterako (hilak 5), Soldata eta pentsio duinak, orain! Hemen eta denontzat! lelopean. Donostiakoa 17:30ean izango da, Bulebarretik abiatuta. “ELA, LAB, ESK, CGT, CNT, STEILAS, ETXALDE, HIRU, CCOO eta UGT sindikatuekin izandako harremanen ondoren, aurrerapauso bat eman dugu eta pertsona, langile eta pentsiodun guztiei dei egiten diegu apirilaren 5ean kalera irten eta manifestazio horietan parte hartzera”, nabarmendu du EHPMk.
Mugimenduak nabarmendu duenez, “pertsona guztiak dira ezinbestekoak eta ongietorriak izango dira; guztion esku dago aberastasunaren bidezko banaketan oinarritutako gizartea eraikitzea. Onartezina da finantza eta energia enpresa handiek gero eta langile eta pentsiodun gehiagok etekinen errekorrak ezartzen dituzten bitartean gizarte bazterkeriara eta pobreziara eramaten dituen soldata eta pentsio sarrerak izatea”.
Ildo horretatik, “alderdi politiko eta hedabide batzuen narratiba faltsuak errefusatu” dituzte, “gazteen interesak eta pentsiodunen interesak kontrajarri nahi dituztenak”: “Bigarrenei beren diru sarrerak lehenengoen diru sarreren kontura hobetzea leporatzen diegu. Funtsezko borroka da hori, gutxienez soldatetan eta gutxieneko pentsioetan genero arrakala amaitu dadin. Emakumeen aurkako injustizia, herritarren erdiaren kontrako injustizia erradikala eta onartezina”.
