Bi gizon atxilotu dituzte hogei mugikor eta bi ordenagailu eramangarri lapurtzeagatik
Donostiako Udaltzaingoak bi pertsona atxilotu ditu asteburuan, hogei telefono mugikor eta bi ordenagailu eramangarri lapurtzea egotzita. Ertzainek azken egunetan telefonoren bat lapurtu dietela salatu dutenei dei egin diete Morlanseko ertzain-etxera joan daitezen, aurkitutako mugikorretako bat eurena izan daitekeelakoan.
Larunbat arratsaldean egin zuten lehen atxiloketa. Egun batzuk lehenago, ordenagailu eramangarria lapurtu ziotela salatu zuen pertsona batek Udaltzaingoari deitu zion, esanez ordenagailuaren bilatzailea seinalea ematen hasi zitzaiola Amara Berriko Aitzol parkearen inguruan. Udaltzainek ordenagailuaren arrastoa jarraitu zuten Easo plazaraino, eta bertan, 43 urteko gizon bat atzeman zuten, motxila batean bi ordenagailu eta hamahiru mugikor zeramatzana.
Arratsalde horretan bertan, Martutene auzoan patruilatzen ari ziren udaltzainek beste gizon bat aurkitu zuten, 30 urtekoa. Gizona ihes egiten saiatu zen Ertzaintza zegoela ohartu zenean, baina atxilotzea lortu zuten. Bigarren gizon honek ere motxila bat zeraman, zazpi telefono mugikorrekin, 1.025 eurorekin eta koaderno bat apunteekin, telefono mugikor askori eta horietako bakoitzari lotutako kostuari buruzkoak.
Bi gizonak ertzain-etxera eraman zituzten, eta han atxilotuta daude, beharrezko eginbideak egin eta epailearen esku jartzeko zain.
