Bizikletak udarako ibilgailu onenak direla dio udalak
Herrerako Dbizi geltokia.Donostiako Udala 
Donostiako Udalak mugikortasun aktiboaren aldeko urratsak egiten ari dela nabarmendu du. Hori dela eta, hainbat nobedade jarri dituzte abian bizikletaren inguruan, uda honetan hiriko mugikortasunaren elementu nagusi bihur dadin.
Bizikletaren erabilerak gora egin du azken urteotan, eta udalak are gehiago sustatu nahi du, ingurumenerako ez ezik, hori erabiltzen dutenen osasunerako ere onuragarria baita. Horregatik, Bizikletaren Plan Integrala prestatzeko lanak amaitzen ari da Mugikortasun Zuzendaritza. Plan hori datozen hilabeteetan jarriko da abian, eta etorkizuneko bizikleta sarearen ibilbide orria zehaztuko du. Edonola ere, udalak aurrera egiten jarraitzen du mugikortasun aktiboa lehenesteko bidean, hain zuzen ere garraiobide motordunen gainetik.
Bidegorri sarea
Bizikleta garraiobide gisa aukeratzeko faktoreetako bat bidegorrien edo bizikleta bideen sarea da. Ildo horretan, bizikleta bide bereiziz osatutako 66,38 kilometroko sarea du Donostiak —horietatik %13 oinezkoekin batera erabiltzeko modalitatean, eta beste % 87 bizikleta bide eta bizikleta espaloi modalitateetan—. Sare horri beste tarte batzuk txertatzeko asmoa du udalak: guztira, 1,5 km gehiago.
Gainera, 2024 eta 2025 urteen artean , bidegorrien zoladura konpontzeko proiektua egin dute hiriko hiru ardatz hauetan: Salamanca pasealekua, Gernikako Arbola pasealekua, Bizkaia pasealekua, Eustasio Amilibia eta Balezale kalea; Satrustegi eta Infanta Kristina arteko goragunea, Tolosa hiribideko beheraguneak hobetzea eta Juan Olasagasti kaleko bizikleta pasabidea; eta Frantzia pasealekua, Federico Garcia Lorca pasealekua, Kolon pasealekua eta Kale Berria.
Gainera, gaur egun zoladura hobetzeko lanak egiten ari dira Gregorio Ordoñez kalean —Loiolako Erriberetara doan igoera—, eta Egia kalean —Astiñeneko zubiaren eta Aldapa kalearen artean—, eta hobekuntzak egiten ari dira Easo kalearen eta Pedro Egaña kalearen arteko txirrindularientzako eta oinezkoentzako bidegurutzean.
Dbizi zerbitzua
Duela bost urte abian jarri zenetik, Dbizi da hirian gehien erabiltzen den garraio publikoko zerbitzuetako bat: 1,3 milioi joan-etorri erregistratu ziren 2024an. Geltokiei dagokienez, udaletxeko pareko geltokia hobetuko da. Udaletxean egiten ari ziren obrak zirela eta, geltoki hori Nautiko ondoan birkokatu zen. Orain, ainguratzeak Ijentean birkokatuko dira berriro, eta beste batzuk egun dauden lekuan utziko dira, Nautiko ondoan, alegia.
Bizikletentzako aparkalekuak
Bizikleta erabiltzeko funtsezko beste elementu bat helmugatik gertu aparkatzeko malgutasuna da, eta, beraz, bizikletak behar bezala aparkatzeko espazioak ematea da Udala lantzen ari den ardatzetako bat.
Hala, 2023 eta 2024 urteen artean, 33 bizikleta aparkaleku iraunkor instalatu ziren hirian; hau da, 330 aparkaleku plaza gehiago jarri dira. Ondorioz, gaur egun, bizikletak aparkatzeko plaza kopurua 8.400 ingurukoa da.
Eta 2025erako aurreikuspenen arabera, aurten hamabi bizikleta aparkaleku berri (120 plaza) ezarriko dira, Donostiako hainbat auzotan banatuta. Egun, hiriko eremuetako eskaria aztertzen ari da Mugikortasun Zuzendaritza, era horretan, aparkalekuak ezartzeko kokagune egokienak zein diren zehaztu eta eremu bakoitzean eskaeraren araberako zerbitzua eman ahal izateko.
Baina bizikletak aparkatzeko sare iraunkorra zabaltzeko ahalegin horretaz gain, aurtengo udan ere aldi baterako bizikleta aparkalekuak jarriko dira hondartza eta igerilekuetako inguruneetan. Joan den astean hasi ziren errefortzuko aparkaleku horiek instalatzen, eta hondartzen denboraldia amaitu arte egongo dira jarrita.
Errefortzuko bizikleta aparkaleku horiek hiriko bost eremu hauetan daude kokatuta: Zurriola pasealekuan (Kursaaleko kubo txikiaren ondoan), Jesus Maria Leizaola pasealekuan (Zurriolako morruaren eremuan), Kontxa pasealekuan (Rafael Munoa), Kontxa pasealekuan (tunelaren ondoan, Antiguan), eta Anoeta pasealekuan (Paco Yoldi kiroldegiaren ondoan).
Bizikleta aparkaleku horiez gain, hirian 290 bizikleta aparkaleku seguru daude, Dbizi Parking sistemaren barruan (hainbat abonuren bidez erabil daiteke sistema hori). Bizikletaren erabilera sustatzeko planaren barruan, udalak sare hori handitzea aurreikusita dauka.
