Bi urteko kartzela zigorra gizon batentzat, lo zegoen emakume bati sexu erasoa egiteagatik
Erasotzaileak ez du kartzelara sartu beharrik izango, zigorra eten diotelako, hurrengo bi urteetan deliturik berriro ez egiteko baldintzarekin.
Donostiako Asanblada Feministak eraso matxistak salatzeko egindako elkarretaratze bat. 
Bi urte eta erdiko kartzela zigorra jarri diote gizon bati, Donostiako etxebizitza batean lo zegoen neska bati sexu erasoa egiteagatik. Hasiera batean, auzipetuarentzat hamar urteko espetxe zigorra eskatu zuten, baina epaiketan zehar akordioa lortu du Fiskaltzarekin eta akusazio partikularrarekin, eta gertakariak onartu ditu.
Akusatuak aldez aurretik 15.000 euro kontsignatu zituen epaitegietako kontuan biktima konpentsatzeko, eta, beraz, eragindako kaltea konpondu izanaren aringarria aplikatu zaio. Hala ere, gizona ezin izango da emakumearekin harremanetan jarri, ezta harengana hurbildu ere bost urtez, eta ez da kartzelan sartuko, kartzela zigorra eten diotelako, hurrengo bi urteetan deliturik berriro ez egiteko baldintzarekin.
Fiskaltzaren akusazio idazkiaren arabera, gertakariak 2023ko otsailaren 10eko goizaldean jazo ziren, inputatua eta emakumea aipatutako etxebizitzan elkartu zirenean. Bertan, bakoitzak sofa desberdin batean eman zuen gaua, etxeko egongelan.
Handik denbora batera, 08:00ak aldera, biktima esnatu egin zen, eta ikusi zuen auzipetua sexu erasoa egiten ari zitzaiola. Emakumeak antsietate atake bat izan zuen, gizonari gelditzeko eskatu zion, eta handik aldendu zen, etxeko beste gela batera joateko. Gela horretan edredoi bat jarri zuen gorputzaren inguruan, akusatuak berriro ukitu ez zezan.
Hala ere, gizona atzetik joan zitzaion, eta sexu erasoa egin zion berriro, emakumearen baimenik gabe. Emakumeak une oro gelditzeko eskatu zion, baztertzen saiatzen zen bitartean.
