Añorgako karmenak

Baserriz baserri ibili dira Añorgako oilasko biltzaileak, dantzan, eskean eta giro ederrean

2025/07/14

Azken txanpan murgiltzen hasi dira Añorgako Karmengo jaiak, gaur ospatzen ari diren Kuadrillen Egunarekin (hilak 14). Tradizioari eutsiz eta asteburuko neke eta ajeari aurre eginez, oilasko biltzaileak goizean goiz abiatu dira Jolas Etxetik, baserriz baserri eskean eta dantzan aritzeko.

Dantzatzeko, mokadua egiteko eta zintzurrak bustitzeko hainbat geldialdi egin dituzte, hala nola, Gaztelumenditarren etxean eta Errekalde elkartean. Jai giro ederrean ibili dira, eta horren erakusgarri da Joseba Parron San Sebastian argazkilariak egindako irudi bilduma, jarraian ikus dezakezuena.