Secundino Esnaola eta Bermingham kaleen arteko bidegurutzeko lanak amaitu ditu udalak
Oinezkoen irisgarritasuna eta bide segurtasuna hobetzeko helburuarekin egin dituzte obrak.
Secundino Esnaola kalea eta Bermingham kaleen arteko bidegurutzea.Donostiako Udala 
Donostiako Udalak Gros auzoko Secundino Esnaola eta Bermingham kaleen arteko bidegurutzeko lanak amaitu ditu. “Bidegurutze horretako galtzada espaloien kota berera igo da, eta 15 zentimetroko irtengunea erantsi zaio”, azaldu du Hiri Mantentze eta Zerbitzuetako zinegotzi Carlos Garciak. Espaloiak handitu dituzte, zebrabideen tartea laburtzeko eta oinezkoentzako ikusgarritasuna hobetzeko. Horregatik, abiadura muga murriztu dute, orduko 10 kilometrora. Gainera, seinaleak instalatu dituzte, gidariei abisatzeko.
Halaber, motorrentzako aparkalekua berrantolatu dute, izan ere, kurbetan ez dago leku nahikorik. Orain, zebrabideen aurretik egokitu diren eremuetan bakarrik aparkatu ahal izango dira motorrak. Bermingham kaleko pasabidearen ondoko aparkalekua mantenduko dute eta Secundino Esnaolan desgaitasuna duten pertsonentzat erreserbatutako plaza ordez, aparkaleku berri bat jarri dute.
Garciak proiektuaren helburua azpimarratu du: “Lan hauen helburua beti izan da bide segurtasuna eta oinezkoen irisgarritasuna hobetzea zirkulazio handiko elkargune honetan, bai oinezkoentzat, bai ibilgailuentzat”. Gainera, etorkizunean horrelako beste lanak aurrera eramateko asmoa adierazi du: “Lehenengoa da, baina ez da azkena izango, horrelako ekintzek hiri-mugikortasun jasangarria hobetzen laguntzen dutela uste baitugu”. Lanen aurrekontua 70.000 eurotik gorakoa da. Obra hiri irisgarritasuna hobetzeko udal planaren barruan sartzen da, 1,4 milioi euroko inbertsio globalarekin.
Obra honekin hiriko galtzada baten lehen gurutzaketa sortu dute.
