Glad is the Day jaialdia bertan behera uzteko eskatu dute Donostiako eta Gipuzkoako hainbat elkartek
Ingurumenean "kalte larriak" eragiten dituela salatu dute, eta pertsonen segurtasunerako zein osasunerako ez dela egokia.
Glad is the Day jaialdia.Donostia Kultura 
Abuztuaren 3an Egiako parkean egingo den Glad is the Day musika jaialdia bertan behera uzteko eskatu dute Donostiako eta Gipuzkoako hamazazpi elkartek. Argudiatu dutenez, jaialdiak “kalte larriak” eragiten ditu ingurumenean, eta parkeko faunarentzat ere ez da egokia, “animaliak izutu eta parketik uxatzen baititu”.
Elkarteek nabarmendu dutenez, parkeak “oxigeno kopuru handia” sortzen du egunero; jendearen “osasuna zaintzen” laguntzen du, eta “indarrean dugun bero globala arintzen du”. Bertan, gogorarazi dutenez, “ehun urtetik gorako” zuhaitzak bizi dira; hala nola, haritzak, zumarrak, haginak, platanondoak, sekuoia gorria edota ginkgoa, besteren artean.
Gainera, eremu horretan babestutako fauna bizi dela adierazi dute, tartean, kukulunberak (arkanbeleak), kaprikornio handia, txantxiku arrunta, apo arrunta, zirauna, horma-sugandila, gerri-txori iluna, garrapoa, urubia, trikua, hainbat saguzar espezie, eta beste.
Elkarteen ustetan, Glad is the Day jaialdiak “ikuspuntu naturalista batetik, eta herritar askorenenetik, ingurumenari eraso bortitza egiten dio, Egiako eta Donostiako natur ondare unibertsala txirotzen duena”.
Adierazpen horiekin batera, jaialdia ez antolatzeko hainbat arrazoi zerrendatu dituzte ohar batean:
1. Ingurumen kalte larriak:
– Antolaketarako, parkera ibilgailu astunak sartzen dira, eta fauna babestua harrapatzen dute.
– Donostia Kulturaren arabera, iazko jaialdian 25.000 lagun bertaratu ziren parkera; lurra zanpatu eta trinkotu zuten (25.000 lagun x 75 kilo = 1.875 tona), eta lurreko fauna ornogabea kaltetu zuten, zeina elikadura katebegia baita animalia ornodunen espezie askorentzat.
– Fauna ornodun eta ornogabedun aleak zapaldu eta birrindu zituzten 25.000 lagun bertaratuen 50.000 zapatek.
– Parkeko beheko aldean jarritako bafleek bolumen handian hedaturiko dezibelek egun osoan zehar fauna babestuen seinale akustikoak baliogabetu zituzten, haiengan izua sortuz eta zenbait aleri bat-bateko heriotza eraginez muturreko estresaren ondorioz.
– Harresiaren eta huntzez estalitako aurrien ondoan, txepetxen habia berantiarrak (Troglodytes troglodytes) eta horma-sugandila eta txantxiku arrunta babesten diren lekuan, bafleak, txosnak, garagardo kañeroak eta upelak jartzen dira, eta pixa erruz egiten da, biharamunik ez balego bezala, lurra azidifikatuz eta animalia babestu askok zeharkatzen duten eta bizi diren substratua pixez blaituz.
2. Pertsonen segurtasunerako arrisku larria:
– Ez dago edukiera jakinik, ez eta berau eskatuko duen fiskaltzarik.
– Ez dago larrialdi planik horrelako ekitaldi jendetsu batean, zoritxar publiko bat gertatuz gero.
– Zigarrokin kantitate izugarriak botatzen dira hosto artera, bero boladen eta muturreko tenperaturen garaian, eta abuztuan baso sutea gertatzeko arrisku handia sortzen dute.
– Adarrak bat-batean erortzeko arriskua, tenperatura altuen eraginez, eta lurreko zamak (jendearen pisua) eta bibrazioek (musika eta jauzi jendetsuak) larriagotua.
3. Osasunarentzako arrisku larria:
– Parkean eltxo-tigrearen (Aedes albopictus) populazio egonkor eta gero eta handiagoak daude. Asiako hego-ekialdetik datorren espezie inbaditzailea da, eta gaixotasun infekziosoen bektorea izan daiteke (dengea, zika, chikungunya, sukar horia, Mendebaldeko Niloko birusa)… transmisio hori gerta daiteke eltxoak aurretik kutsatutako pertsona bati ziztatu badio eta ondoren beste pertsona osasuntsu bati pika egiten badio. Natura Babesteko Nazioarteko Batasunak munduko 100 espezie exotiko kaltegarrienen zerrendan sartu du.
– Mozkorraldiak, kutsadura etilikoa eta alkoholaren aldeko giroa.
4. Hainbat motatako balizko irregulartasunak:
– Hainbat iturrik adierazi dutenez, Donostiako Udaleko Ingurumen Sailak eta Donostiako Udaleko Hiri Mantentze eta Zerbitzuetako Sailaren barruko Parke eta Lorategien atalak bost urte daramatzate Glad is the Day egitearen kontrako ebazpenak ematen, eta Donostia Kulturako zuzendaritzak ez die jaramonik egin haien jarraibideei. Era berean, bi eskaera eginak dituzte udal erregistroan, datu hori argitzea eskatuz, baina ez diete zalantzarik argitu, eta Hiri Mantentze Sailak Parkearen barruan erasorako baimendutako bide publikoaren okupazio planoak soilik eskaintzen dizkiete, jakinarazi dutenez.
