“Marruma beti egon izan da Zipotz jaietan inplikatuta elkarte eta taberna gisa”
Marruma tabernak irabazi du Zipotz jaietako pintxo lehiaketako Jai Giro saria. Agus Rodriguez Marruma tabernako arduradunak azaldu duenez, bere lankide Joxe Saca sukaldariaren errezeta da, eta saltsa sekretu bat du.
Agus Rodriguez (ezkerrean) eta Joxe Saca (eskuinean), Marruma tabernan. Marruma taberna 
Zein da Zipotz jaietan Jai Giro Saria irabazi duen pintxoa?
Pintxoak ez du izenik, baina osagaiei dagokienez, nagusiki, porrua, euskal txerrikia, tipula, errukula kimuak eta saltsa bat ditu, baina saltsa sekretua da. Porrua egosi egiten da mantso-mantso, eta ondoren, kazuelatxo batean aurkezten da.
Iaz ere Jai Giro saria irabazi zenuten pintxo lehiaketan. Pintxo berdina egin zenuten?
Bai, iaz bigarren postua eskuratu genuen, eta aurten, hirugarrena. Hala ere Jai Giro saria eman ziguten, izan ere, Marruma beti inplikatzen da jaietan; antolakuntzan, pintxo lehiaketan, rally poteoan eta egitarauan antolatzen diren jarduera guztietan. Lehiaketarako, urtero pintxo berri bat egiten saiatzen gara, eta iazkoa beste pintxo bat izan zen.
Noiztik zara Marruma tabernako arduraduna?
Hau nire bigarren etapa da hemen. Lehen etapa 1997tik 2000ra izan zen, aurreko mendean, alegia [barrez]. Gero, hamazazpi urtez, Rekalde taberna izan nuen, ezaguna izan zena. Jarraian, 2019tik 2023ra bitarte, Pandora tabernan egon nintzen, Grosen. Duela bi urte eta erdi, ixtea erabaki nuen, eta hemen, nire bigarren etapari hasiera eman nion 2023ko urrian. Laster bi urte beteko ditut hemen.
Nolakoa izan da itzulera hori?
Oso pozik nago. Imajinatu zenbat aldatu den gizartea eta auzoa 25 urte hauetan. Nik esango nuke orduko bezeroetatik apenas inor ez dela geratzen, eta hori pixka bat Donostian gertatzen ari denaren isla da. Grosekoak garenok, ia inor ez da auzoan bizi, hau da, nire adinekoak eta gazteagoak ezin gara auzoan bizi, ezin delako etxe bat erosi. Horrez gain, esango nuke Marrumak bilakaera positiboa izan duela zentzu batean: lehen, Marruma agian ezker abertzaleko militanteentzako espazio bat zen, itxia. Eta gaur egun, elkartearen espazio honetan, afari solidarioak egiten dira egunero, Palestinako zinemari buruzko ziklo bat egiten da Elias Kerejeta zinema eskolako ikasleek aurrera eramaten dutena, Arrats elkarteko hainbat emakume hilean behin etortzen dira kozinatzera proiektu baten barruan, eta afari solidarioekin lotuta, hainbat gazte magrebtarrek ere bere egin dute espazio hau, urtebetetzeak ospatzeko eta abar. Lehen, elkarteko atea hesi bat zen, eta gaur egun espazio zabalago bat da. Jarraitzen du Groseko ezker abertzalearentzat bilgune bat izaten, baina oso irekia da aldi berean.
Zenbat langile zaudete Marruman?
Hiru. Pili Martinez sukaldarietako bat da, Joxe Saca sukaldean eta tabernan aritzen da eta ni ere tabernan egoten naiz.
Zergatik erabakitzen duzue jaietan inplikatzea?
Ni, pertsonalki, jaien sortzaileetariko bat naiz. 1990ean, 18 urte nituela, gazte asanbladan nengoen, eta ordura arte, Groseko jaiak San Inazioak ziren. Egitarauan zegoena zen urte horretan hildakoen omenez meza, bigantxak eta ezer gutxi gehiago. Beraz, elkartu ginen gazte asanbladako kideak, auzo elkartekoak, elkarte gastronomikoetako ordezkariak, tartean Marrumakoak, eta 1990ean, Groseko jaiak asmatu genituen, argi genuelako ez genuela santurik ospatuko. Handik gutxira, Zipotz pertsonaia berreskuratu genuen nonbaitetik, eta handik urte batzuetara, Legami pertsonaia sortu zen. Beraz, ni beti egon naiz inplikatuta jai batzordean, eta bestalde, Marruma ere beti egon izan da elkarte eta taberna gisa.
Tabernan nolako giroa izaten da uda parte honetan?
Marruma, nolabait esateko, kale ilun batean dago, Zabaleta eta Mirakruz kaleen artean. Zabaletan eta Mirakruzen jende mugimendu handia egoten da, eta hemen berez ez, baina harrituta nago zenbat kanpotar etortzen ari diren, alde batetik. Gehiago esango dizut: gu gauzak ahalik eta txukunen egiten saiatzen gara; hau taberna txikia da, ez jatetxe bat, eta gauza xumeak ditugu, pintxoak eta errazioak. Baina Googleko iruzkinetan 4,8ko puntuazioa dugu 5etik, eta gehienak kanpotarrak dira, kuriosoa da hori. Pintxoen kalitatea, tabernako giroa eta prezioa dira gehien goraipatzen dituztenak, baina baita egiten diegun harrera ere. Hau auzoko taberna bat da, eta gure oinarria eguneroko bizilagunak edo inguruan lan egiten dutenak dira, baina puntualki, Groseko jaietan eta Jazzaldian adibidez, oso giro ona izan dugu.
Zipotz jaien nolako balorazioa egiten duzu?
Ni neure buruarekin oso exijentea naiz, baina 8 bat esango nuke. Une batzuk oso indartsuak izan dira, baina beste une batzuetan, normala denez, taberna lasai egon izan da. Hala ere, hemendik pasatu dira txarangak, erraldoi eta buruhandien konpartsak, eta lehen aldiz egin duten rally poteoan ere pasatu ziren hemendik auzoko gazteak.
Zipotz jaietako Jai Giro saria irabazi duen Marrumako pintxoa.Marruma taberna
