Ondarretako ertzain etxean «ur filtrazioak eta osasunaren kalterako baldintzak» daudela salatu du Erne sindikatuak
Ertzaintzaren komisaria, Antiguan. Ertzaintza 
Ondarretako ertzain etxeko instalazioetan ur filtrazioak eta osasungaitzak diren baldintzak dituztela salatu du Erne sindikatuak. Gaineratu dutenez, egoera hori behin eta berriro errepikatzen da, “behin betiko konponbiderik eman gabe”.
Hain zuzen ere, sindikatuak ohar baten bidez jakinarazi duenez, euria egiten duen bakoitzean, “agerian geratzen da mantentze-lanik eza eta utzikeria zerbitzu publikoarentzat funtsezkoa den lantoki batean”. “Tantaka ari diren sabaiak, horma bustiak eta hezetasun eta lizun arriskua lankide askoren egunerokoa dira, eta ez dute zerikusirik lan-ingurune duin, seguru eta osasungarria izan behar duenarekin”, gaitzetsi dute.
Horregatik, Ernek “berehalako jarduketa eta egiturazko konponbidea” eskatu ditu, “ez behin-behineko petatxuak”. Sindikatuak hainbat aldiz ohartarazi du egoera hori, eta jakinarazi du ez dituela atzerapen gehiago onartuko. “Duintasun profesionala ere lan baldintzetatik hasten da, eta Ondarretako filtrazioak hutsegite onartezina dira”, nabarmendu dute.
