Asiako zaporeak nagusi aurtengo Culinary Zineman
Tetsuro Maeda sukaldari japoniarrari buruzko dokumentala ikusteaz gain, berak sortutako menu batez gozatzeko aukera izango da aurten Culinary Zinema zikloan. 
Pen-Ek Ratanaruang zuzendari thailandiar sarituaren thriller batek, New Yorken jatetxe vietnamdar bat irekitzeko ametsa duen Texasko sukaldari bati buruzko ekoizpen frantziar batek eta Joan Roca, Javier Urondo eta Tetsuro Maeda chefen inguruko fikzio banak osatzen dute Donostia Zinemaldiaren 73. edizioko Culinary Zinema saileko menua. Osagaiak eta haiekin batera doazen afariei buruzko xehetasunak eman dituzte Tabakalerako LABen Zinemaldiko zuzendari Jose Luis Rebordinosek eta Basque Culinary Centerreko (BCC) zuzendari Joxe Mari Aizegak.
Zikloa Pen-Ek Ratanaruang (Bangkok, 1962) zuzendari thailandiarraren Morte cucina thrillerrak hasiko du. Sukaldaritza thailandiarrari buruz duen ezagutza baliatuta mendeku hartzeko baliatuko duen Sao-ren istorioa dakar oraingoan Zinemaldira, 2007an Perlak sailean Ploy aurkeztu ondoren. Itxi, aldiz, Uno de los nuestros. El legado de Joan Roca visto por 70 estrellas Michelin filmak. Jorge Fernandez Mayoral (Logroño, 1982) eta Virginia Jönas Urigüenek (Bilbo, 1975) zuzendutako lanak euren jatetxeetan 70 Michelin izan dituzten hogei sukaldari biltzen ditu El Celler de Can Roca jatetxeko sukaldaria omentzeko.
Bien tartean, beste hiru emanaldi egingo dituzte. Tetsu, Txispa, Hoshi dokumentalak Tetsuro Maeda sukaldari japoniarrari eta Anboto mendiaren magalean dagoen Txispa jatetxeari buruzko dokumentala da. Jon Arregui Larrazabalek (Portugalete, 1970), bigarrenez parte hartuko du sailean, 2013an Francisco Javier Gutiérrez Peredarekin batera zuzendutako Euskadi, cocina en la cumbre aurkeztu ondoren.
Nan Feix (Boulogne-Billancourt, 1974) zuzendari frantziarrak, berriz, bere lehen film luzea aurkeztuko du: Mam. New Yorken bere jatetxe propioa irekitzeko anbizioa duen Texasko sukaldari baten inguruko fikziozko film batekin, hain justu ere.
Mariana Erijimovichek (Buenos Aires, 1975) zuzendari gisa debutatu du, Juan Villegas zuzendari eta ekoizle argentinarrarekin batera (Buenos Aires, 1971), Jota Urondo, un cocinero impertinente filmarekin. Sukaldari argentinarraren eta hark Buenos Airesko bazter batean sortutako erresistentzia gunearen erretratua egiten du dokumentalak.
Bostak 10.000 euroko Culinary Zinema saria eskuratzeko lehiatuko dira. Zinema aretoetako saioez gain, saileko laurekin batera afari tematikoak egingo dituzte irailaren 23tik 26ra Basque Culinary Centerren. Ohiko formatua jarraituko dute: hamar jankide mahi bakoitzeko, esperientzia aberasteko elkarrizketak sustatzeko. Hauetarako sarrerak (emanaldiak eta afariak) datorren ostiralean, hilak 29, salgai jarriko dituzte 10:00etan sansebastianfestival.janto.es eta tickets.kutxabank.es webguneen bidez. 85 euro balioko dute emanaldi eta afari tematikorako sarrerek.
Afari tematikoak
Culinary Zinemaren afari tematikoak irailaren 23an hasiko dira Morte cucina film thailandiarraren emanaldiaren ondoren. Madrilgo Kitchen 154 proiektuko Alex Zurdo, Txitxo Fernandez eta Gabryella Ismeriak diseinatuko du menua. 2014an sortutako proiektuak zaporea formaren aurretik jartzen du, Bangkokeko, Hanoiko edo Luang Prabangeko merkatuak gogorarazten dituzten plater biziekin.
Tetsu, Txispa, Hoshi dokumentalak Tetsuro Maeda sukaldari japoniarraren eta Txispa jatetxearen sormen-unibertsoari irekitzen dizkio ateak. Aparteko kasu honetan, Maedak berak diseinatuko du irailaren 24an menu esklusibo bat, sukaldaritza ulertzeko duen modu berezia partekatuz: intimoa, harrigarria eta produktuaren garbitasunarekin eta txingarraren suarekin oso lotuta dagoena. Proposamenak Japoniako esentzia gogora ekartzen duten zaporezko bidaia batera gonbidatuko ditu –hartzigarriak, mazerazioak, kontserbak–, osagai lokalekin berrinterpretatuak, freskoak eta sasoikoak, eta euskal ukitu nahastezinarekin nabarmenduak. Esperientzia paregabea, tradizioa eta lurraldea uztartuko dituena ñabarduraz betetako sukaldaritza elkarrizketa batean.
Jota Urondo, un cocinero impertinente pelikulak Javier Urondo sukaldari argentinarra eta Buenos Airesko izkina batean hark sortu zuen erresistentzia kultural eta gastronomikorako lekua erretratatzen ditu: Urondo Bar. Urondoren sukaldaritza, memoriaz eta izaeraz betea, nortasun- eta topaketa-ekintza bihurtzen da. Afari honetan, irailak 25, Urondok berak, bere taldearekin batera, afaria prestatuko du zuzenean, Argentinatik bidaiatu ondoren. Zaporea, istorioa eta errebeldia uztartuko dituen proposamen bat, filmaren espirituarekiko sintoniari eutsiz.
Uno de los nuestros dokumentalak Joan Rocaren –El Celler de Can Rocako sukaldariaren– legatua omentzen du 70 Michelin izarren begiradaren bidez. Emanaldi honek emango dio amaiera aurtengo Culinary Zinemari, eta azken afariak nazioarteko gastronomiako bi erreferente nagusi bilduko ditu irailaren 26an: Joan Roca eta Dani Garcia, lau eskuzko menu batean.
