Eguzkitakoa gordetzeko garaia
Gauak egunari gaina hartzen dion moduan, udazkenak udari atea jotzen dion eran, irailean sartzeak ikasturte berriari ekitea suposatzen duen gisan eta udan bizitako guztia argazki eta bideoen bidez oroitzea egokitzen den garaian, aldaketak bizi ohi ditugu guk ere. Aldaketa batzuk txikiak eta ia ikusezinak izaten dira, unibertsitatean maila batetik bestera pasatzerakoan edo ingeleseko akademian, urte batez gehiagoz, hainbeste desiotako titulua lortzeko ahalegina egiten jarraitzen duzunean bezala.
Nire ustez, aldaketarik handienak ikasturte berriak inguruko jendearen aldaketa suposatzen duenean etortzen dira. Are gehiago jende horri estimua badiozu. Izan ere, lantoki batean ondo zaintzen zaituztenean, lanak adina garrantzi —edo gehiago— hartzen du lankideekin duzun harremanak. Baina aldaketak ere bizitzaren parte dira, eta lehenago edo geroago iritsi egiten dira, argazkiko gazteei uneren batean eguzkitako hori gordetzea tokatuko zaien eran.
Nire partetik, eskerrik beroenak IRUTXULOKO HITZAn daudenei eta nirekin uneren batean egon direnei. Eguzkitako hau jaso eta beste nonbait jartzea tokatzen bazait ere, hemen bizitakoak nirekin daramatzat.
