«Uste eta esaten dutena baino gehiago irakurtzen da gaur egun»
Errabundia existitzen ez den hitza da. 'Errabundo' hitzetik dator: noraezean ibiltzen dena. Paula Manninok, dendaren jabeetako bat, duela bi hilabete ireki zuen liburu denda.
Paula Mannino, Errabundia liburu dendaren jabea.Inge Arzensek 
Zer esan nahi du liburu denda independentea izateak?
Liburu denda independente batek ez du beste talde handi batekiko mendekotasuna. Jabeok eramaten dugu aurrera denda. Guk erabakitzen ditugu salduko diren liburuak, guri interesgarriak iruditzen zaizkigulako. Independentea izatea gure irizpideetan oinarritzea da, soilik. Izan ere, liburu saltzaileak desagertzen ari diren arraza bat gara.
Nola hartu zenuten liburu denda irekitzeko erabakia?
Nik liburu munduan betidanik egin dut lan. Editorea eta Literatura irakaslea izan naiz. Gainera, idazlea naiz, eta liburu denda bat irekitzea betidanik izan da nire ametsa. Horregatik, nire helburua lortzeko dena utzi dut atzean: lana utzi nuen, beste herrialde batera etorri nintzen eta zerotik hasi nintzen.
Bizilagunek nola hartu dute?
Oso ondo. Bizilagunak dendara gerturatzen dira eta zoriontzen gaituzte. Jendea oso pozik dago auzoan liburu denda ireki dugulako. Liburu denda babestea da, bertara etortzea eta liburuak erostea.
Liburu denda asko itxi dituzte azkenaldian…
Denda gehienak jabeak erretiratzen direlako ixten dituzte, ez porrot egin dutelako. Hala ere, ez da lan erraza, arrisku handikoa baizik, inoiz ez dakigulako liburuak salduko diren ala ez.
Guk ziurtasun osoz ireki dugu denda. Nire ustez, liburu denda txiki gabeko mundua, mundu pobreagoa da, eta gutxiago gustuko dudana.
Saltoki handiak gelditzen badira, soilik, hauek gizartean irakurtzen dena erabakiko dute eta salmenta botere osoa izango dute. Ondorioz, argitaletxe eta idazle txikiak ez dira beraiek sortutako mundu txikian sartuko. Beraz, egun hori iristean, gizarteak zer pentsatzen duen kontrolatuko dute, baita ere.
Zein jarduera prestatu dituzue?
Udazkenerako irakurketa kluba prestatu dugu, literatur solasaldiak eta liburu kontaketak umeentzat. Ondoren, baita ere, irakurketa kluba egingo dugu te, merienda eta liburuekin. Halaber, dagoeneko idazle batzuekin hitz egiten ari gara beraien liburuak dendan aurkezteko aukera izateko. Gainera, sare sozialen bidez, jendeak liburuak gomendatzen dizkigu, eta hauekin dendan txoko batean mahai bat antolatuko dugu.
Autore eta ahots aniztasuna duzue?
Bai. LGBTI autoreak, Afrikakoak, Latinoamerikakoak, Europakoak, Euskadikoak, eta abar. Mundu osoko eta gutxiengo guztietako idazleak ekartzen ditugu, aberatsa iruditzen zaigulako. Horrela, beste dendetan egoteko aukera ez duten liburuei hemen lekua eskaintzen diegu.
Agian, liburu denda handietan salmenta zenbakiak gehiago behatzen dituzte, eta, horregatik, ez dute edozein liburu saltzen. Nik ere dendak etekinak izatea nahi dut, baina ez da garrantzitsuena. Esate baterako, hogei urte dituen liburu interesgarri bat iristen bazaigu, nik berdin erakutsiko dut. Denda ireki nuenean, liburu hauek salduko ez zirela uste nuen, baina ezuste handia izan nuen jendeak kalitatea bilatzen duelako oraindik.
Zein hizkuntzetako liburuak saltzen dituzue?
Gaztelaniaz eta ingelesez idatzitako liburuak ditugu. Euskarazkoak baita ere, tokiko hizkuntza baita. Eta, gutxika, liburuak frantsesez saltzen hasi gara.
Irakurle kopurua azken urteotan aldatu dela nabaritu duzue?
Estatistikek irakurle kopurua handitu dela diote; Pandemiaren ondoren, kopurua nahiko hazi zen. Gainera, azken aldian, jendea teknologiaz nekatzen ari dela nabaritu dut. Eta, horregatik, irakurtzen hasi dira berriro. Uste eta esaten dutena baino gehiago irakurtzen da gaur egun.
Zein adineko jendea etortzen da?
Adin guztientzat aurkitu daiteke zerbait Errabundian: 0 urtetik 100 urtetara bitarte. Gure irakurle zaharrenak 97 urte ditu, eta auzoko bizilaguna da. Zinemaren inguruko liburu ugari irakurtzen ditu. Hala ere, irakurle gehienak 35 eta 70 urte bitarteko pertsonak dira; emakumeak, orokorrean.
Zein da gehien saltzen duzuen generoa?
Gehien saltzen dugun generoa nobela literarioa da. Kalitate handiko liburuak saltzen ditugu, bereziki, komertzialak ez direnak. Barre egiteko liburu ugari ere saltzen ditugu, horregatik, liburu mota horiekin mahaia antolatu dugu. Honekin batera, doluaren eta amatasunaren inguruko liburuak eskatzen dizkigute.
Argitaletxearen batekin kolaboratzeko intentzioa duzue?
Bai. Argitaletxeek liburuak bidaltzen dizkigute, ondoren hauekin batera jardueraren bat antolatzeko. Baina oraindik kolaborazioak egiteko goiz dela uste dugu, eta denda guztiz martxan izan arte itxaron nahi dugu. Hala ere, Penguin argitaletxeak La trampa de la edad liburuaren aurkezpenera gonbidatu gintuen uztailean Matia institutuan. Lankidetza oso interesgarria izan zen hori.
