Donostia Sutan 1813 elkarteak abuztuaren 31ko «isildutako sarraskia» oroitu du Parte Zaharrean
Gazako genozidioa ere izan dute gogoan, eta aitortza egin diete Palestinako herritarrei.
Donostia Sutan 1813 elkarteak urte hartan gertatutakoa oroitzeko ekitaldia egin du Parte Zaharrean.Joseba Parron 
212 urte beteko dira bihar, abuztuak 31, tropa portugaldarrek eta ingelesek, espainiarren babesarekin, Donostia erre eta herritarren aurkako sarraskia egin zutenetik. Hori dela eta, urteroko legez, Donostia Sutan 1813 elkarteak hiriko beste eragile batzuekin batera, 1813ko sutean gertatutakoa gogoratzeko eta memoria historikoa berreskuratzeko ekitaldia egin du Parte Zaharrean.
San Bizente elizatik hasi, eta auzoan barrena, urte hartan gertaturikoa oroitu dute, kontakizun, bertso, eta antzerki bidez. Nabarmendu dutenez, Erresuma Batuko, Portugaleko eta Espainiako Erresumako armadek aliantza inperialista bat osatuz 1813an egin zutena “dudarik gabe genozidioa izan zen”. Datuak ere hor daude: Donostiako hiribilduan bizi ziren 5.000 lagunetik 1.600 (%32) hil ziren sarraskiaren ondorioz (militarrek erailda, goseak jota edo izurriteek eraginda). “Guda armadek desarmaturik zegoen eta defentsa gabe zegoen populazio baten aurka sarraskia egin zuten”, adierazi dute.
Horrez gain, urteurrenaren harira, ez da ahaztu behar militarrek Donostiako emakume gehienak bortxatu zituztela, eta hiria suntsitu ostean, urte askotarako miseriara kondenatu zituztela biztanleak.
Gaza gogoan
Parte Zaharrean barrena, Santa Maria basilikara iritsi dira, eta bertan, Gazako genozidioa ere izan dute gogoan. “Zoritxarrez, 2025. urtean antzeko gertakizunen lekuko izaten ari gara. Gainera, gertatzen ari denaren berri zuzenean jasotzen dugu. Baina gobernu askoren erreakzioa, bereziki mendebaldekoena, axolagabekeria eta konplizitatea da oraindik ere”, salatu dute.
Defendatu dutenez, gobernu eta agintari horien guztien gainetik “gizarte zibila” dago. “Gizarte zibil honek, beste behin ere, justizian eta herrien arteko errespetuan oinarritutako mundu baten alde dihardu. Horregatik, gure ahalmenen barruan, Donostian 1813an gertatutakoaren aurrean, urte hauetan guztietan isilik egon direnak salatzen jarraituko dugu, eta aldi berean, Gazako genozidioaren borreroak eta horien konplizeak salatuko ditugu”, adierazi dute.
Ekitaldia Plaza Berrian amaitu dute, Donostian sarraskian hildakoak eta Palestinako herritarrak gogoan. Gazan hildako haurrak oroitu nahi izan dituzte bereziki, eta dantza baten bidez, aitortza eginez eman diote bukaera.
