Gizonezko bat atxilotu dute Altzan, Udaltzaingoak honek ezkutuan zituen 10 kilo haxix aurkitu ostean
Udaltzaingoaren Morlansko egoitza. 
38 urteko gizonezko bat atxilotu du Donostiako Udaltzaingoak droga trafikoagatik, agenteek Altzako auzoko baratze eremu batera sartzen saiatzen ari zela harrapatu ostean. Ustez, han zituen ezkutatuta hamar haxix pakete: guztira, 10 kilo haxix.
Felix Iranzo pasealekuan zebilen patruila batek ikusi zuen gizonezkoa, eta poliziaren presentziaz ohartzean, korrika hasi zen inguruko baratzeetara. Agenteek gizona jarraitu zuten, eta baratzetara salto egitera zihoala geldiarazi zuten: orduan aurkitu zituzten agenteek haxix paketeak.
Atxilotu eta komisariara eraman zuten. Epaileak, ondoren, aske utzi zuen, karguekin.
